Լարախաղացը
Fri, 09 Oct 2026 09:00:31 +0400
Մեր երկրին ուղղված վտանգները նվազեցնող-չնկատող Նիկոլ Փաշինյանը, տեսեք՝ ի՜նչ հրաշալի է զգում իր իշխանությանը սպառնացող վտանգները։ Իսկ նրա իշխանությանը մի քանի ուղղությամբ է վտանգ սպառնում։ Գլխավոր վտանգը դրսից է, իհարկե՝ արեւմտյան երկրներից, Ռուսաստանից, ԱՄՆ-ից, հարեւան Ադրբեջանից ու Թուրքիայից։ Եվ այդ ուղղությամբ նա տիտանական ջանքեր է գործադրում, որպեսզի այդ վտանգները չեզոքացնի, լարախաղացի նման այդ՝ միմյանց հետ լուրջ հակասություններ ունեցող բեւեռներից բոլորին հաճոյանա ու չնեղացնի։
Մեկին՝ համոզի, մյուսին՝ ենթարկվի, երրորդին՝ զիջման գնա, հետո խաղաքարտերը խառնի եւ հերթականությունը փոխի։ Ընդ որում, նա շատ լավ զգում է, թե այդ պահին որ բեւեռից է գալիս գլխավոր վտանգը, եւ հրշեջի նման նետվում է այդ ուղղությունից եկող կրակը մարելուն։ Մյուս վտանգը, իհարկե, բխում է սեփական հանրությունից, բայց սա ավելի հեշտ մարվող վտանգ է՝ իր համար հասկանալի ու կառավարելի։ Ճիշտ է՝ այս 8 տարում անչափելի կորուստներ է բերել մեր հանրությանն ու պետությանը, բայց մեր դյուրահավատ ժողովրդին խաբելու, փաստերը խեղաթյուրելու, իրադրությունը գլխիվայր շրջված ներկայացնելու հարցում Նիկոլ Փաշինյանն անգերազանցելի է, եւ ամենակարեւորը՝ նա շատ լավ է ճանաչում մեր ժողովրդին։ Օրինակ, գիտի, որ անասելի համբերատար ժողովուրդ է հայ ժողովուրդը՝ կարող է ամեն ինչի հետ հաշտվել, համբերել, ներել ու սիրել։ Գիտի, որ մեր ժողովուրդը միշտ հակված է ցանկալին իրականության տեղ պատկերացնելու եւ հաճախ ռեալ վտանգները չի տեսնում, մինչեւ այդ վտանգն արդեն վրա հասած չի լինում։ Գիտի նաեւ, որ մեր ժողովուրդը քչով բավարարվող է, սոցիալական պահանջներով գրեթե երբեք փողոց դուրս չի գալիս։ Էմոցիոնալ է, բռնկվող։ Սիրում է շատ ու լավ ճառողներին։