Արամ Վարդևանյանը բարձր է գնահատել ՀՀ-Իտալիա համագործակցությունն ու զարգացող հարաբերությունները
Fri, 09 Oct 2026 17:57:01 +0400
ՀՀ ԱԺ նախագահի տեղակալ, Հայաստան-Իտալիա բարեկամական խմբի անդամ Արամ Վարդևանյանը հոկտեմբերի 9-ին հանդիպել է ՀՀ-ում Իտալիայի արտակարգ և լիազոր դեսպան Ալեսսանդրո Ֆերրանտիի հետ։
Հանդիպմանը ներկա է եղել Հայաստան-Իտալիա բարեկամական խմբի անդամ, խմբակցության քարտուղար Տիգրան Աբրահամյանը։
Ողջունելով դեսպանին՝ Արամ Վարդևանյանը բարձր է գնահատել Հայաստան-Իտալիա արդյունավետ գործակցությունն ու զարգացող հարաբերությունները, որոնք հիմնված են ընդհանուր արժեքների վրա։
Խոսելով երկու երկրների խորհրդարանական կապերից՝ ԱԺ փոխխոսնակն ընդգծել է, որ հատկապես բարեկամական խմբերի համագործակցությամբ հնարավոր է ավելի խորացնել առկա հարաբերությունները, ինչպես նաև օգտագործել տնտեսական, կրթության, մշակույթի և այլ բնագավառներում առկա մեծ ներուժը։
Արամ Վարդևանյանն իր դիտարկումներն է ներկայացրել մեր երկրում ժողովրդավարական գործընթացների, մարդու իրավունքների պաշտպանության, օրենքի գերակայության հարցերի առնչությամբ։
Շնորհակալություն հայտնելով ընդունելության համար՝ դեսպանը նույնպես կարևորել է երկկողմ կապերի խորացումը, խոսել երկու երկրների գործակցությամբ Հայաստանում իրականացվող բազմաթիվ ծրագրերի մասին։
Անդրադարձ է կատարվել Հայաստան-Եվրամիություն ընդլայնվող հարաբերությունների շրջանակում երկկողմ գործակցությանը։