Քննիչ հանձնաժողո՞վ կձևավորվի
Tue, 20 Oct 2026 14:50:22 +0400
«Ուժեղ Հայաստան» խմբակցության քարտուղար Տիգրան Աբրահամյանը հայտարարել է, որ ակնկալում են՝ մինչև պետական բյուջեի քննարկումների մեկնարկը խորհրդարանում անդրադարձ կկատարվի Շաքիի դեպքերին։
Նրա խոսքով՝ հարցը նախկինում քննարկվել է ԱԺ պաշտպանության և անվտանգության հարցերի մշտական հանձնաժողովի նիստում, և այժմ անհրաժեշտ է շարունակել քննարկումները՝ պարզաբանումներ ստանալու համար։
Աբրահամյանը նշել է, որ քննարկումներին պետք է մասնակցեն նաև իրավապահ համակարգի ներկայացուցիչները, որպեսզի պատգամավորները հնարավորություն ունենան իրենց հուզող հարցերն ուղղելու համապատասխան կառույցների ղեկավարներին։
Նա ընդգծել է, որ դեպքից հետո Հայաստանի հարավային հատվածում տարածվել են հնարավոր ներթափանցումների մասին լուրեր, ինչը, իր գնահատմամբ, անհանգստություն է առաջացրել քաղաքացիների շրջանում։
Պատգամավորը նշել է, որ եթե պաշտպանության և անվտանգության հարցերի հանձնաժողովն ու ՔՊ խմբակցության պատգամավորները անհրաժեշտ քայլեր չձեռնարկեն հարցի հետագա քննարկման ուղղությամբ, իրենք հանդես կգան քննիչ հանձնաժողով ստեղծելու նախաձեռնությամբ։