«Մետայի» գործադիր տնօրեն Մարկ Ցուկերբերգը ընկերության տնօրենների խորհրդի հետ քննարկել է Կալիֆոռնիայից տեղափոխվելու հնարավորությունը, եթե նահանգը միլիարդատերերի վրա հարստության հարկ սահմանի։ «Մետայի» ֆինանսական հաշվետվության համաձայն՝ ձեռնարկատերը նույնիսկ հայտարարել է իր 110 միլիոն դոլարանոց Պալո Ալտոյի առանձնատունը վաճառքի հանելու մտադրության մասին՝ հնարավոր օրենքի ուժի մեջ մտնելուց առաջ տեղափոխվելու համար։

Խոսքը վերաբերում է 40-րդ նախաձեռնությանը, որն առաջարկում է միլիարդատերերի հարստության վրա 5% հարկ սահմանել։ Ցուկերբերգի համար, որի զուտ կարողությունը գնահատվում է մոտավորապես 250 միլիարդ դոլար, հնարավոր վճարումը կարող է հասնել 12,5 միլիարդ դոլարի։

ԱՄՆ Արժեթղթերի և բորսաների հանձնաժողովին (SEC) ներկայացված 109 էջանոց փաստաթղթի համաձայն՝ Ցուկերբերգը զգուշացրել է ղեկավարությանը, որ հարկը վճարելու համար կարող է ստիպված լինել վաճառել իր «Մետայի» բաժնետոմսերի զգալի մասը։ Սա կարող է թուլացնել իր հիմնադրած ընկերության նկատմամբ իր վերահսկողությունը։

Նրա հարստության մեծ մասը կապված է «Մետայում» իր բաժնեմասի հետ՝ մոտավորապես 13%։ Սակայն նրա B դասի բաժնետոմսերը ունեն ընդլայնված քվեարկության իրավունք և թույլ են տալիս նրան պահպանել ընկերության վերահսկողությունը։

Հարկային նախաձեռնության շուրջ քննարկումները սրվել են հուլիսին։ Ցուկերբերգը բազմիցս բարձրացրել է այս հարցը ընկերության ղեկավարների, այդ թվում՝ Meta-ի առաջատար անկախ տնօրեն Ռոբերտ Քիմմիթի հետ։ Հաղորդագրության համաձայն՝ ձեռնարկատերը զգուշացրել է, որ նախաձեռնության ընդունումը կարող է ազդել Կալիֆոռնիայում ապրելու հնարավորության և հարկերը վճարելու իր կարողության վրա։ Հայտնում է NEWS.am STYLE-ը։