Նիկոլ Փաշինյանն անոնսեց արտահերթ խորհրդարանական ընտրությունների անցկացման հնարավորության մասին: Մտածել, որ այդ ընտրություններով նրան հնարավոր է հեռացնել իշխանությունից, միամտություն չէ, այլ՝ անմտություն: Փաշինյանն առաջիկա մի քանի ամիսն օգտագործելու է՝ երկրում բացարձակ բռնապետական համակարգն ամրապնդելու համար, որպեսզի հնարավորություն ունենա ստանալ իր համար ցանկալի խորհրդարան` ՔՊ-ական սահմանադրական մեծամասնություն՝ խամաճիկ, ոչինչ չորոշող եւ իր հրահանգներով կառավարվող կեղծ ընդդիմությամբ: Ներկա խորհրդարանական երկու խմբակցությունները ներկայացնող կուսակցությունները ընդհանրապես չեն լինի ապագա խորհրդարանում, Փաշինյանը կարգելի այդ կուսակցությունների եւ ոչ միայն նրանց գործունեությունը:

Փաշինյանի վերջին ճեպազրույցից հետո երկրում ստեղծվել է նոր քաղաքական իրավիճակ, որն էապես տարբերվում է մինչեւ 2026 թվականի հունիսի 7-ի խորհրդարանական ընտրությունները եւ անգամ դրանից հետո առկա իրավիճակից, որը պետք է արձանագրել: Նա երեկ փաստացի հայտարարեց, որ ոչ մի խնդիր չի տեսնում ԵԱՏՄ անդամ պետությունների կողմից Հայաստանի անդամակցության կասեցման հարցում, վստահ է, որ դա տնտեսական առումով Հայաստանին ոչնչով չի սպառնում: Քաղաքական իմաստով նա Ռուսաստանին մեղադրեց Հայաստանում ներքաղաքական անկայունություն հրահրելու մեջ, ԵԱՏՄ անդամության կասեցումն անվանեց անկայունության հրահրման երրորդ դեպքը: Այստեղ տնտեսական բաղադրիչ չկա, քաղաքական բաղադրիչ է: «Նպատակը Հայաստանում ներքաղաքական անկայունություն հրահրելն է եւ Հայաստանի նկատմամբ վերահսկողություն սահմանելը: Դե ֆակտո եւ դե յուրե Հայաստանին անկախությունից զրկելը»,- հայտարարեց նա:

Երբ 2027 թվականի հունվարից Հայաստանի անդամակցությունը ԵԱՏՄ-ին կասեցվի, Փաշինյանն իր իշխանության եւ դրա ձախողումների դեմ բոլոր բողոքողներին, անկախ նրանից, թե ինչից են դժգոհ՝ գազի գնի թանկացումից, գների բարձրացումից, թե իրենց արտադրած ապրանքներն իրացնելու անհնարինությունից, հռչակելու է անկախության դեմ գործող ուժեր, Պուտինի ագենտներ, եւ նրանց դեմ ռեպրեսիվ մեքենան գործելու է ամբողջ խստությամբ: Նոր ընտրությունների դեպքում այլեւս ՌԴ նախագահը չի կարողանալու խնդրել Փաշինյանին՝ չարգելել պրոռուսական ուժերի մասնակցությունն ընտրություններին, նախ՝ այն պատճառով, որ հունվարից հետո Փաշինյանն այլեւս չի հանդիպի Պուտինին, բացի դա, այսպես կոչված, պրոռուսական ուժերի գործունեությունը փաշինյանական դատարանները կճանաչեն հակասահմանադրական, նրանց մասնակցությունը խորհրդարանական ընտրություններին կարգելվի՝ հիմք ընդունելով նրանց պրոռուսական, հետեւաբար՝ թշնամական բնույթը: Եթե Հայաստանի իշխանությունը գնում է Ռուսաստանի, ԵԱՏՄ-ի հետ հարաբերությունների խզման, Հայաստանի քաղաքական կառուցվածքում չեն կարող լինել Ռուսաստանի հետ բնականոն հարաբերություններ պահպանելու կողմնակից ուժեր, կամ դրանք պետք է լինեն լուսանցքային:

ՀԱՊԿ գլխավոր քարտուղար Թաալաթբեկ Մասադիկովը հայտնել է, որ նոյեմբերի 11-ին կայանալիք ՀԱՊԿ խորհրդի նիստում կարող է որոշում կայացվել Հայաստանին կազմակերպությունից հեռացնելու մասին՝ ակնարկելով, որ Հայաստանի ներկայացուցիչը զբաղված էր կազմակերպության գործունեության մասին տեղեկություներ հավաքելով եւ դրանք ինչ-որ կողմի փոխանցելով: Իսկ ՀԱՊԿ-ից հեռացումը ԵԱՏՄ-ից հեռացման նախերգանքն է:
Փաշինյանն ընդդիմություն կնշանակի պրոարեւմտյան ուժերին, նրանց վերջին շրջանի ակտիվացումը պայմանավորված է հենց այդ հանգամանքով: Սրանք հիմա կեղծ ընդդիմություն են խաղում, քննադատում են Փաշինյանին, դատի են տալիս փաշինյանական իշխանության միջինից ցածր պաշտոնյաների, իշխանությանը մեղադրում են հակաժողովրդավար լինելու մեջ: Իրենց տրամաբանությամբ, եթե իրական ընդդիմադիր ուժերն ու գործիչները զրկված լինեն ընտրություններին մասնակցելու հնարավորությունից, հանրության ընդդիմադիր մասը կգնա եւ ձայն կտա իրենց:

Բայց Հայաստանի քաղաքական դաշտի վերաձեւումը Փաշինյանին չի ազատի Ռուսաստանի հետ կոշտ կոնֆրոնտացիայից: Եթե անգամ «Ուժեղ Հայաստանի» փոխարեն խորհրդարանում ներկայացած լինի «թուրքահպատակ Հայաստան» կուսակցությունը, իսկ «Հայաստան» խմբակցության փոխարեն՝ «Արեւմտյան Ադրբեջան» խմբակցությունը, միեւնույն է՝ Ռուսաստանի հետ հակամարտությունը չի ավարտվելու: Փաշինյանը Ռուսաստանից պետք է խլի հայկական երկաթուղիների կոնցեսիան, երկրից դուրս հանի ռուսական ռազմաբազան եւ սահմանապահ զորքերը: Փաշինյանը հույս ուներ, որ երկաթգծի հարցում ինչ-որ զիջումներ անելով կամ ատոմակայանի հարցում անորոշ խոստումներ տալով, կկարողանա որոշ ժամանակով հետաձգել ԵԱՏՄ-ից հեռացումը, բայց դա տեղի չունեցավ, հրապարակվեց ԵԱՏՄ-ում Հայաստանի անդամակցության կասեցման հետեւանքների մասին հայտնի զեկույցը:

Առաջիկայում մեզ սպասվում է դրամատիկ իրադարձություններով հարուստ ժամանակաշրջան: Այն ուղեկցվելու է քաղաքական ընդդիմության դեմ կիրառվող կոշտ միջոցներով եւ Ռուսաստանի հետ առճակատման ծանր տնտեսական ու սոցիալական հետեւանքներով: