Հոկտեմբերի 28-ին, ՀՀ քննչական կոմիտեն միջնորդություն է ներկայացրել Երևան քաղաքի ընդհանուր իրավասության քրեական դատարանի Շենգավիթի նստավայր, որպեսզի դատարանը որպես խափանման միջոց երկամսյա կալանքի որոշում կայացնի Իջևան քաղաքում հաշվառված 21-ամյա Գեորգի Թարջումանյանի՝ հանրությանը հայտնի բլոգեր «Գեորգիքս»-ի նկատմամբ։ Դատավոր Վահագն Մելիքյանը մերժել է քննիչի միջնորդությունը. խափանման միջոց է ընտրվել վարչական հսկողությունը՝ նրա տեղաշարժի ազատությունն է սահմանափակվել։

Գեորգի Թարջումանյանը «Հրապարակի» հետ զրույցում ասաց, որ խափանման միջոց է ընտրվել վարչական հսկողությունը. «Մինչև ժամը ութը ազատ իմ գործերով եմ զբաղվելու, նկարահանումներ և այլն, բայց ժամը 8-ին պետք է պարտադիր տանը լինեմ: Դե բոլորս էլ օրենքի առաջ հավասար ենք, ես էլ, Դուք էլ», – ասաց բլոգերը:

Նրա խոսքով` դատարանը որպես խափանման միջոց է ընտրել վարչական հսկողությունը երեք ամսով. «Ինձ ձերբակալել էին, հետո դատարանը որոշում կայացրեց: «Բրասլետը» դեռ չեմ ստացել, երկու օրից հավանաբար կստանամ, ասացին՝ քանակը քիչ է: Գործը վերաբերում է վարորդական չունենալուն, բայց ես արդեն դիմել եմ այն ստանալու համար: Երկար ժամանակ է ես մեքենա չեմ վարում, վարորդս է վարում»:

Հիշեցնենք, որ իշխանական բլոգերը մի քանի անգամ բռնվել էր՝ առանց վարորդականի մեքենա վարելիս եւ համացանցում աղմուկ էր բարձրացել, որ ընդդիմադիրներին մի չնչին խախտման համար կալանավարում են ամիսներով․ իսկ այս անձնավորությունը, փաստորեն, արտոնյալ է՝ նրան չեն պատժում։ Ըստ ամենայնի, աղմուկն իր դերը խաղացել է եւ որոշել են ցուցադրաբար մի թեթեւ սահմանափակել նրա տեղաշարժը։