Անհրաժեշտ է դադարեցնել զիջումների քաղաքականությունը
Mon, 09 Nov 2026 12:57:53 +0400
ԱԺ «Ուժեղ Հայաստան» խմբակցության ղեկավար Նարեկ Կարապետյանը ՔՊ-ին մեղադրել է Հայաստանը պատերազմական իրավիճակների և պարտությունների առաջ կանգնեցնելու մեջ՝ իշխող քաղաքական ուժին բնորոշելով որպես «եռապատերազմի կուսակցություն»։
Եռաբլուրում լրագրողների հետ զրույցում Կարապետյանը հայտարարել է, որ իշխանության գալուց ի վեր ՔՊ-ն իր հետ Հայաստան է բերել պատերազմի վտանգը։
Նրա խոսքով՝ երեք պատերազմների և երեք պարտությունների պատասխանատվությունը կրում է հենց իշխող ուժը։ Կարապետյանի գնահատմամբ՝ իշխանությունները չեն կարողանում երկիրը զերծ պահել պատերազմի սպառնալիքից, քանի որ, իր ձևակերպմամբ, հենց իրենք են ստեղծել դրա համար նպաստավոր պայմանները։
Ընդդիմադիր պատգամավորը նաև նշել է, որ Հայաստանի արտաքին քաղաքականության մեջ զիջումների շարունակությունը կարող է նոր պահանջների առիթ դառնալ Ադրբեջանի համար։ Նա պնդել է, որ հայկական կողմի հնարավոր զիջումների ակնկալիքով Ադրբեջանը ձգձգում է խաղաղության պայմանագրի կնքման գործընթացը։
Կարապետյանի համոզմամբ՝ անհրաժեշտ է դադարեցնել զիջումների քաղաքականությունը, իսկ Հայաստանի արտաքին քաղաքականության ներկայիս պատասխանատուների օրոք պատերազմի վտանգը շարունակելու է մնալ երկրի օրակարգում։