Գերմանիային այս ձմռանը գազի պակաս է սպառնում
Wed, 11 Nov 2026 17:00:41 +0400
Գերմանիան կարող է այս ձմռանը բախվել գազի դեֆիցիտի․ երկրի գազապահեստարաններում պաշարները պատմական նվազագույն մակարդակի են հասել։ Նոյեմբերի 1-ի դրությամբ պահեստարանները լցված են եղել ընդամենը 61%-ով, ինչը կառավարության սահմանած թիրախից 9 տոկոսային կետով ցածր է։
Ինչպես գրում է Neue Zürcher Zeitung-ը, իրավիճակի հիմնական պատճառներից մեկը Իրանի պատերազմի հետևանքով էներգակիրների գների կտրուկ աճն է։ Ամռանը գազի մեկ մեգավատտ-ժամի գինը տատանվում էր 40-60 եվրոյի սահմաններում։ Առևտրականները, ակնկալելով գների նվազում, հետաձգել են պահեստարանների լցման գործընթացը, սակայն վերջին շրջանում գազի գինը 2022 թվականից ի վեր առաջին անգամ գերազանցել է 100 եվրոն մեկ մեգավատտ-ժամի դիմաց։
Գերմանիայի գազապահեստարանների օպերատորների ասոցիացիայի՝ INES-ի գնահատմամբ՝ խիստ ցրտերի դեպքում երկիրը կարող է հունվարին, փետրվարին և մարտին ամսական մինչև 6.6 տերավատտ-ժամ գազի պակաս ունենալ։ Հաշվարկներում արդեն ներառված են հարևան երկրներից ստացվող մատակարարումներն ու հեղուկացված բնական գազի ներմուծումը։
Փորձագետների գնահատմամբ՝ ձմռան սովորական եղանակային պայմաններում գազամատակարարումը պետք է կայուն մնա։ Սակայն ծայրահեղ ցրտերի դեպքում անխափան մատակարարումը երաշխավորել հնարավոր չի լինի։