Ավինյանի պնդմամբ՝ նորակառույց շենքերից Երևանը միայն շահու՞մ է
Mon, 16 Nov 2026 12:24:44 +0400
Երևանում վերջին շրջանում աճել են ինչպես մետրոպոլիտենից, այնպես էլ հանրային տրանսպորտից օգտվող քաղաքացիների թիվը։ Միաժամանակ ավելացել է նաև քաղաքում շահագործվող ավտոմեքենաների քանակը։ Այս մասին հայտարարել է Երևանի քաղաքապետ Տիգրան Ավինյանը։
Նրա խոսքով՝ տրանսպորտային միջոցների թվի ավելացումը պայմանավորված է նաև երկրի տնտեսական զարգացմամբ, բնակչության եկամուտների աճով և նոր ավտոմեքենաներ ձեռք բերելու հնարավորությունների ընդլայնմամբ։
Ավինյանը չի համաձայնել այն տեսակետին, թե մայրաքաղաքում նոր շենքերի կառուցումն ու շինարարական թույլտվությունների տրամադրումն ինքնին հանգեցնում են երթևեկության ծանրաբեռնվածության աճի։
Քաղաքապետի համոզմամբ՝ նորակառույցներում բնակիչների և ավտոմեքենաների հայտնվելը շինարարության անմիջական հետևանք չէ, քանի որ մեքենաների քանակն ավելանում է հիմնականում այն պատճառով, որ մարդիկ աշխատանքի և եկամուտների աճի շնորհիվ հնարավորություն են ստանում նոր մեքենաներ գնելու։
Նա նաև ընդգծել է, որ նորակառույց բնակարաններ տեղափոխվող քաղաքացիները հաճախ նախկինում բնակվել են այնպիսի շենքերում, որտեղ կայանատեղիներ չեն եղել, մինչդեռ նոր շենքերում առկա են ստորգետնյա ավտոկայանատեղիներ։