Ինչքան ուզում է չարախոսեն, մեկ է` մենք մեր գործն անելու ենք
Tue, 17 Nov 2026 18:15:02 +0400
Իշխանական քարոզչամիջոցներից մեկը գրել է, որ առաջիկա օրերին սննդի անվտանգության ոլորտում հետաքրքիր բացահայտումներ են լինելու: Խոսքը հայտնի փորձագետներից մեկի` «Իրազեկ և պաշտպանված սպառող» ՀԿ-ի նախագահ Բաբկեն Պիպոյանի մասին է, որի գործունեության վերաբերյալ, ըստ իշխանական լրատվամիջոցի, իրավապահ մարմինները կարող են ինչ որ գործողություն իրականացնել։ Իբրեւ թե փորձագետը, որը սննդամթերքի փորձաքննություններ է իրականացնում եւ հայտնաբերում, թե դրանք ինչքանով են վտանգավոր հանրության համար, տնտեսվարողներից գումար է պահանջել՝ ակնարկելով, որ հակառակ դեպքում նրանց արտադրանքի վերաբերյալ բացասական հրապարակումներ կարող են հայտնվել մամուլում: Եւ այդ գործում նրան աջակցել է «Ուժեղ Հայաստան»-ի պատգամավոր Հարություն Մնացականյանը: Որպես ապացույց էլ հրապարակել են Մնացականյանի և Բաբկեն Պիպոյանի եղբոր` Դավիթ Պիպոյանի համատեղ լուսանկարը: Զավեշտալի է, որ պրոֆեսիոնալ լրագրության մասին ճառեր ճամարտակող իշխանություններին սպասարկող կայքը նման նողկալի մեթոդներով ուզում է վարկաբեկել Բաբկեն Պիպոյանին, ով պետական մարմինների փոխարեն կատարում է նրանց աշխատանքը` բացահայտում է միրգ-բանջարեղենի, կաթնամթերքի, այլ սննդամթերքի մեջ առկա խախտումները եւ իրազեկում է հանրությանը: Մենք զրուցել ենք Բաբկեն Պիպոյանի հետ:
– Ինչի՞ մասին է գրել Տարոն Չախոյանի կայքը: Տեղյա՞կ եք` ինչ որ վարույթ հարուցվե՞լ է Ձեր դեմ:
– Լուրջ մի ընդունեք, սունկ կայք է, այ եթե օրինակ այս կայքի փոխարեն «Հրապարակ»-ը գրած լիներ նույն բանը, դատի կտայի, քանի որ կշիռ ունեք, բայց ի՞նչ ասեմ այս սունկ կայքին, որն անգամ հետադարձ կապի հնարավորություն չի տալիս ընթերցողին: Հերքում էլ չեմ կարող պահանջել` ոչ մի կոնտակ չկա նշված: Շատ եմ խնդրում իրավապահներին, որպեսզի մաքսիմալ արագ հետազոտեն այս ամենը: Մեր այդ նախաձեռնությունն այնպիսին է, որ մենք չենք որոշում ինչ ստուգել: Քաղաքացիները մեզ դիմում են ինչ-որ հարցով, մենք ընթացք ենք տալիս: Չկա մի ընկերություն, որ քաղաքացիներն ասեն` ստուգեք, մենք չստուգենք: Մի քանի շաբաթ քննարկվում էին գինու հարցը, այժմ գինիներն ենք ստուգում: Ինչքան ուզում է չարախոսեն, մեկ է` մենք մեր գործն անելու ենք: Ուզում են այնպես անեն, որ չաշխատենք, հետո էլ ասեն` չեն աշխատում, տեսա՞ք` մենք գրեցինք, վախեցան ու լռեցին: Չի լինելու նման բան: Ազնիվ աշխատել ենք, և շարունակելու ենք մեր աշխատանքը:
– Հանրությունը սովոր է, որ նման ստուգումներ, հետազոտություններ ոլորտի փորձագետներն իրականացնում են գրանտային ծրագրերի միջոցով: Դուք ի՞նչ միջոցներով եք ստուգումները իրականացնում, դրանք լաբորատորիա ուղարկում և այլն, այդ բոլորը ծախսերի հետ է կապված ի վերջո:
– Մենք հայտարարել ենք, որ այս պրոյեկտի գաղափարը մեզ մոտ ծագել է ընկերական զրույցի ընթացքում: Եթե ինչ-որ մեկը պատվիրում է նման բան, պատվիրում է իր շահերից ելնելով: Կաթնամթերք արտադրողների մեջ կան և նախկին իշխանությանը հարողներ, և ներկա: Քաղաքականը կարող եք բացառել: Որպեսզի ստուգումների մեջ ազատ լինենք, մենք դրամահավաք ենք կազմակերպել: Մեր նպատակն այն է, որ 500-1000 քաղաքացի 500 դրամ, 1000 դրամ փոխանցի, և մենք կարողանանք ինչ-որ ոլորտ ստուգել, ուսումնասիրել: Հիմա էլ դրամահավաք ենք կազմակերպել, որպեսզի ներմուծված կաթնամթերքը ստուգենք: 30 հազար դրամ է դեռ հավաքվել, իսկ մեզ առնվազն 500 հազար դրամ է հարկավոր, որպեսզի լաբորատոր ստուգումներ իրականացնենք:
– Իսկ կաթնամթերք արտադրողների հետո որևէ խոսակցություն, հանդիպում ունեցե՞լ եք:
– Բացարձակ, ոչ մի հանդիպում չենք ունեցել: Ես կաշկանդվածություն չունեմ, վաղը գուցե հանդիպեմ, սուրճ խմեմ, ճաշեմ նրանց հետ: Իմ թշնամին չեն կաթնամթերք արտադրողները: