Աստված թող իրենց երկար կյանք տա, բայց ռադ լինեն` գնան
Tue, 17 Nov 2026 22:15:00 +0400
ՔՊ-ականները հերթական արշավն են սկսել Վեհափառի դեմ: Այս անգամ ԱԽՔ Ալեն Սիմոնյանն է, իր նոր պաշտոնը շեշտելով, անդրադարձել Վեհափառին՝ գրելով. «Կտրիճ Ներսիսյանը ազգային անվտանգության սպառնալիք է»: Նրանից որոշել է հետ չմնալ ԱԺ նախագահ Ռուբեն Ռուբինյանը եւ դարձյալ ավազանի անունով է կոչել կաթողիկոսին ու հայտարարել. «Ինքն ամենայն հայոց չէ, ինքն ամենայն ՈւժեղՀայաստանոց է, Քոչարյանոց է»:
ՀՀ վաստակավոր արտիստ, հերոս Վարդան Ամալյանի հայրը՝ Դավիթ Ամալյանը, «Հրապարակի» հետ զրույցում ասաց, որ իր պատվից ցածր է համարում այս երկու ՔՊ-ական պաշտոնյաների ասածները մեկնաբանելը կամ նույնիսկ նրանց անունները տալը: «Ես իրենց հայտարարությունները չեմ մեկնաբանում, որովհետեւ իրենք ո՛չ «ազգային» բառի հետ կապ ունեն, ո՛չ «հայ»: Ես իրենց ընդհանրապես չեմ ընդունում, չեմ ճանաչում: Այդ անուն-ազգանունները տալով էլ չեմ ուզում բերանս աղտոտել, այդ մարդկանց ասածները մեկնաբանելը ես համարում եմ մի քիչ պրոբլեմ: «Ազգային» բառը վերականգնելու համար մենք արագ պիտի ազատվենք այդ անուն-ազգանուններից: Իրենց ֆիզիկական գոյությունն ինձ չի հետաքրքրում, Աստված թող իրենց երկար կյանք տա, բայց թող ռադ լինեն, գնան, ուրիշ տեղ ապրեն»,- ասաց երգահան ազատամարտիկը:
Ամալյանը չի հասկանում, թե Վեհափառին ինչպես կարելի է անուն-ազգանունով դիմել, բացի այդ` Վեհափառը, որպես մարդ, մեծ արժեք է, ու դա ինքը հասկացել է անձամբ շփվելով: «Վեհափառի մարդկային հատկանիշներն ու արժեքը թողնենք, նա մեր Հայ առաքելական սուրբ եկեղեցու Վեհափառն է, եւ դա ոչնչով չի տարբերվում Եկեղեցու հանդեպ ոտնձգությունից, իսկ թուրքերի նպատակն է, իրենք էլ թուրքերի մարդիկ են այստեղ: Եթե մենք չհասկանանք, որ այսօրվա մեր իշխանությունը թուրքական է, մենք էլ Արցախի նման կարող է, Աստված չանի, բայց չի բացառվում, որ էգուց, մյուս օրը կանգնենք գաղթի ճամփին»,- եզրափակեց Դավիթ Ամալյանը: