Անգամ ՔՊ-ականների առաջին տիկինն է խոստովանում
Wed, 18 Nov 2026 14:45:26 +0400
Աննա Հակոբյանը, գուցեև իր կամքից անկախ, հաստատեց մի իրականություն, որի մասին այսօր խոսում են բազմաթիվ քաղաքացիներ։ Իրականություն, որը իշխանական քարոզչության աղմուկի տակ այլևս հնարավոր չէ թաքցնել։ Անդրադառնալով երևանյան նյարդեր քայքայող խցանումներին՝ տիկին Հակոբյանն ասում է, որ բազմաթիվ քաղաքացիներ են իրեն դիմել՝ ասելով, թե լավ է, որ վերջապես գտնվեց մեկը, ով համարձակվեց բարձրաձայնել այս խնդրի մասին։ Եւ ինքը գիտի՝ որ պահից են մեզանում սկսել վախենալ բարձրաձայն խոսելուց։ Ուշադրությո՛ւն դարձրեք այս հանգամանքին։
Նույնիսկ իշխանությանն աջակցող քաղաքացիներն են ստիպված իրենց դժգոհությունը փոխանցել Նիկոլ Փաշինյանի տիկնոջը, որ իրենց հուզող խնդիրների մասին բարձրաձայնի, որովհետև ակնհայտ է՝ ընդդիմադիր քաղաքացիները դժվար թե դիմեին Աննա Հակոբյանին՝ իրենց խնդիրների մասին պատմելու համար կամ նրան շնորհակալություն հայտնեին բարձրաձայնելու համար։
Ստացվում է՝ իշխանության ներսում էլ են հասկանում, որ երկրում ձևավորվել է մի մթնոլորտ, որտեղ շարքային քաղաքացին վախենում է, չի համարձակվում բարձրաձայնել իր դժգոհությունը, բողոքը։ Եվ սա արդեն լուրջ է՝ ժողովրդավարության լոզունգներով իշխանությունը պահողների համար։ Երբ մարդիկ նույնիսկ ամենօրյա կենցաղային խնդիրների մասին խոսելու համարձակություն չունեն, ուրեմն խոսքի ազատության մասին իշխանության հնչեցրած գեղեցիկ հայտարարությունները շատ հեռու են իրականությունից։
Նիկոլ ջան, որքան էլ փորձես ճնշումներով լռեցնել դժգոհությունը, որքան էլ փորձես ընդդիմախոսներին թշնամի ներկայացնել, չես կարող մարդկանց ու երկիրն անվերջ կառավարել վախերով։ Անգամ քո կինը մի օր կսկսի դրա մասին բարձրաձայնել՝ տողատակերում հեգնելով ու խայթելով քեզ։ Քո իշխանության գործադրած ճնշումները, այդ թվում՝ շարքային քաղաքացիների նկատմամբ, վաղ թե ուշ բախվելու են հասարակական անհանդուրժողականության ու զայրույթի պատին։ Իսկ այդ օրը շատ ավելի մոտ կարող է լինել, քան քեզ թվում է։ Եվ երբ այս ամենն ավարտվի, քո իշխանությունից կմնան ոչ թե խոստացված բարեփոխումները, այլ չլուծված խնդիրների ու չարդարացված սպասումների մասին դառը հիշողությունները։