Ով է ստում` մեղադրյալը, թե նախկին փոխոստիկանապետը
Wed, 18 Nov 2026 16:27:06 +0400
«Հրապարակը» գրել էր, որ Վալոդյա Գրիգորյանի սպանության մեջ մեղադրվող Գևորգ Հարությունյանի` դատարանում արված հայտարարությունների հիման վրա Քննչական կոմիտեում նախաձեռնվելու է քրեական վարույթ։ ՔԿ-ից այսօր մեզ պաշտոնապես փոխանցեցին. «Դատախազությունից ստացվել է Գեւորգ Հարությունյանի հայտարարությունների վերաբերյալ հաղորդումը, որի կապակցությամբ նախաձեռնվել է քրեական վարույթ»։
Հիշեցնենք, որ մեղադրյալը դատարանում պնդել էր, թե ինքը չի սպանել ընդդիմադիր համայնքապետին, իսկ ինքնախոստովանական ցուցմունքը տվել է փոխոստիկանապետ Վարդան Վարդանյանի կողմից իր ընտանիքի հասցեին հնչեցրած սպառնալիքների ներքո: Նա պատմել էր, թե ինչպես է նախկին բարձրաստիճան ոստիկանը նախ սպառնացել, որ վնաս կտան փոքր քրոջը, ապա նաև մատնացույց արել քարի տակ պահված սպանության գործիք զենքի տեղը և այն ճանապարհը, որով իբրև թե փախել է սպանությունը կատարելուց հետո:
Նախկին փոխոստիկանապետ Վարդան Վարդանյանը հարցաքննությունից հետո հերքել էր, թե սպառնալիքներով ցուցմունք է կորզել Փարաքարի համայնքապետի սպանության գործով՝ հերյուրանք որակելով գլխավոր մեղադրյալի իր հասցեին արած պնդումները: Արփինե Սարգսյանը նույնպես հարցազրույց էր տվել, հայտարարել, որ դատվողը սպանություն կատարողն է, նա ստել է դատարանում: Սակայն Քննչական կոմիտեն քրեական վարույթի շրջանակում պարտավոր է պարզել` ստե՞լ է մեղադրյալը, թե՞ ճշմարտությունն է պատմել հարցաքննության ժամանակ։