Գերիների հարցի բարձրաձայնումը կհեռացնի խաղաղությունից
Wed, 18 Nov 2026 19:06:32 +0400
Ադրբեջանում պահվող հայ գերիների հարցի շարունակական բարձրաձայնումը կարող է խոչընդոտել Հայաստանի և Ադրբեջանի միջև խաղաղության հաստատմանը։ Այս մասին ԱԺ-ում կառավարության հետ հարցուպատասխանի ժամանակ հայտարարել է արտգործնախարար Արարատ Միրզոյանը։
Նա ընդունել է, որ հակամարտությունից մնացած չլուծված հարցեր կան, այդ թվում՝ Ադրբեջանում պահվող հայերի խնդիրը, սակայն ընդգծել է, որ խաղաղության գործընթացում առկա բոլոր խնդիրները հնարավոր չէ միանգամից կարգավորել։
«Այո՛, կան պահվող անձինք, և նրանց գոյությունը Բաքվի բանտերում չի նպաստում խաղաղությանը։ Հիմա ձեր տրամաբանությամբ պետք է գնանք, ասենք՝ մինչև այս հարցը չլուծվի, մենք չենք ստորագրելու խաղաղության համաձայնագիրը։ Ո՞նց եք կարծում՝ սա ավելի շուտ կմոտեցնի՞ մեզ բոլոր հարցերի վերջնական հանգուցալուծմանը, թե՞ գնանք, ասենք, որ խաղաղությունը ստորագրում ենք, այս հարցում էլ գործակցում, այն մյուսում էլ, և տեսանելի ապագայում կստեղծվի իրավիճակ, որ այդ մնացող հարցերն էլ ավելի հեշտ կլինի լուծել»,- հայտարարել է Միրզոյանը։