Ի՞նչ է շահել Հայաստանը՝ Ռուսաստանի հետ հարաբերություն փչացնելուց
Sat, 21 Nov 2026 17:15:08 +0400
Թրամփը Ռուսաստանը համարում է աշխարհի երեք ամենահզոր պետություններից մեկը։ Պուտինի հետ իր հարաբերություններն անվանում է ֆանտաստիկ։ Այսինքն՝ ԱՄՆ նախագահը, անկախ տարաձայնություններից, ընդունում է Ռուսաստանի կշիռը և դրա հետ հաշվի նստելու անհրաժեշտությունը։
Փաշինյանն էլ Ռուսաստանի հետ հարաբերությունների վատթարացումը ներկայացնում է որպես սեփական քաղաքական ինքնուրույնության և համարձակության ապացույց։
Հետաքրքիր է՝ ո՞վ է ավելի լավ հասկանում աշխարհաքաղաքական իրականությունը՝ աշխարհի գերտերության նախագահը, թե՞ Հայաստանի վարչապետը։
Մի բան է, երբ ԱՄՆ-ն իր հարաբերությունները կառուցում է Ռուսաստանի հետ՝ ունենալով տնտեսական, ռազմական, տեխնոլոգիական և քաղաքական հսկայական ռեսուրսներ։ Այլ բան է, երբ Հայաստանը, չունենալով այդպիսի ռեսուրսներ, հակադրվում է Ռուսաստանին։ Հակադրությունը քաղաքականություն չէ, առավել ևս՝ հաղթանակ, եթե այն երկրին ոչ մի շոշափելի արդյունք չի բերում։
Փաշինյանը պետք է պատասխանի ոչ թե քաղաքական ճառերով, ոչ էլ լրագրողներին ահաբեկելով ու վիրավորելով, այլ ամենակարևոր հարցերին․ ի՞նչ է շահել Հայաստանը Ռուսաստանի հետ հարաբերությունների սրումից, ամրապնդվե՞լ են արդյոք մեր տնտեսական և էներգետիկ դիրքերը, չեզոքացե՞լ են անվտանգության ռիսկերը։
Թրամփը կարող է Պուտինի հետ ֆանտաստիկ հարաբերություններ ունենալ, կարող է վիճել նրա հետ, կարող է պատժամիջոցներ կիրառել։ Բայց նա գիտի, թե ինչ է իրենից ներկայացնում Ռուսաստանը և ինչ կշիռ ունի այն աշխարհում։
Պուտինը ներկայացնում է գերտերություն, իսկ Փաշինյանը՝ մի երկիր, որի անվտանգությունը, տնտեսությունն ու ապագան կախված են իր արտաքին քաղաքականության խելամտությունից, որը նրա մոտ իսպառ բացակայում է։
Փաշինյանին թվում է, թե Ռուսաստանի հետ հարաբերությունները փչացնելն արդեն իսկ աշխարհաքաղաքական սխրանք է։ Նրա այդ «սխրանքի» գինը վճարում է Հայաստանը։ Իսկ եթե այդ գինը սեփական գրպանից վճարեր, վստահ եմ՝ յուրաքանչյուր լումայի համար կդողար։