Ֆինանսների նախարարի պարզաբանումը թոշակների հետ կապված
Fri, 27 Feb 2026 14:08:59 +0400
ՀՀ ֆինանսների նախարար Արման Պողոսյանը այսօր՝ փետրվարի 27–ին, Ազգային ժողովում անդրադարձավ 2025–ի տնտեսական աճի ամփոփմանը և դրա կապին երկրի ֆինանսական հնարավորությունների ու կենսաթոշակների բարձրացման հետ։
Նախարարը նշեց, որ երեք ամիս առաջ 2025 թվականի տնտեսական աճի ցուցանիշները դեռ ամփոփված չէին, ինչը անմիջական ազդեցություն ունի հարկային բազայի և, հետևաբար, կենսաթոշակների բարձրացման հնարավորության վրա։ Նա ընդգծեց, որ այժմ 2025 թվականի տվյալների հիման վրա պարզ է դարձել, որ ֆինանսական «ֆիսկալ տարածք» կա՝ թույլ տալով թոշակները ավելացնել 10 հազար դրամով։ Պողոսյանը ընդգծեց, որ այդ որոշումը կայացվել է տնտեսական ակտիվության և երկրի հարկային կարողությունների խնայված հնարավորությունների գնահատման արդյունքում։
Նախարարը պատասխանեց նաև ֆինանսների նախկին նախարար Վարդան Արամյանի մտահոգությանը՝ նշելով, որ նախատեսված ծախսը հաշվարկված է, ֆինանսավորման աղբյուրները հայտնի են և որևէ ֆիսկալ ռիսկ չկա։ Նա շեշտեց, որ նոր բյուջեի ընդունման պահին որոշակի անորոշություն կար, բայց տարեվերջյան աճի արագացումը տրամադրել է լրացուցիչ վստահություն։
Թեպեետ Արման Պողոսյանը վստահեցնում է, որ ֆինանսավորման աղբյուրները հայտնի են և որևէ ռիսկ չկա, սակայն շատերը շարունակում են կասկածել՝ թե որքանով են այս պնդումները համապատասխանում իրականությանը։
Մասնավորապես մասնագետները և քաղաքացիները շարունակում են պնդել,որ փաստացի տվյալները հրապարակված չեն, և դժվար է գնահատել, արդյոք տնտեսության և հարկային համակարգի ներկա վիճակը բավարար է այս ծախսերը պահպանելու համար։ Նման հայտարարություններն առաջ են բերում հարցեր՝ հնարավոր չէ՞, որ որոշումը քաղաքական նկատառումներից է առաջնորդվել։
Իրավիճակը հատկապես ուշադրության է արժանի այն պատճառով, որ շատերն ասում են՝ թոշակների բարձրացումը կարող է կապ ունենալ առաջիկա ընտրությունների հետ։ Ընդհանուր բնակչության շրջանում կարծիք կա, որ սա կարող է լինել մի քայլ, որը նպատակ ունի բարձրացնել հանրության աջակցությունը իշխանությունների նկատմամբ ընտրությունների նախաշեմին։