Ադրբեջանի նախագահ Իլհամ Ալիևն ընդունել է Ռուսաստանի Դաշնության փոխվարչապետ և միջկառավարական հանձնաժողովի համանախագահ Ալեքսեյ Օվերչուկին, հաղորդում է նրա մամուլի ծառայությունը։

Հանդիպման ընթացքում ռուսական կողմը երախտագիտություն է հայտնել Ադրբեջանի ղեկավարությանը տարածաշրջանում ստեղծված բարդ և լարված իրավիճակում Իրանի Իսլամական Հանրապետությունից Ռուսաստանի քաղաքացիների տարհանման գործում ցուցաբերած արագ օգնության համար։

Կայացել է ադրբեջանա-ռուսական հարաբերությունների օրակարգի վերաբերյալ մտքերի մանրամասն փոխանակում։

Զրույցի ընթացքում նշվել է, որ 2025 թվականի հոկտեմբերի 9-ին Դուշանբեում Ադրբեջանի և Ռուսաստանի ղեկավարների հանդիպման ժամանակ ձեռք բերված պայմանավորվածությունների համաձայն՝ կողմերը մոտ ապագայում կիրականացնեն գործնական քայլերի մի շարք, այդ թվում՝ 2024 թվականի դեկտեմբերի 25-ին AZAL ինքնաթիռի վթարի հետևանքով առաջացած խնդիրները լուծելու համար։

Երկու կողմերն էլ ընդգծել են իրենց հանձնառությունը՝ Ադրբեջանի և Ռուսաստանի միջև փոխշահավետ առևտրատնտեսական, ներդրումային, արդյունաբերական և տրանսպորտային-լոգիստիկ համագործակցության հետագա և աստիճանական զարգացմանը։

Հանդիպման ժամանակ քննարկվել են տարածաշրջանում տրանսպորտային հաղորդակցությունների զարգացման հեռանկարները։

Հաստատվել է Հյուսիս-Հարավ միջազգային տրանսպորտային միջանցքի զարգացման աշխատանքները շարունակելու համատեղ մտադրությունը, քննարկվել մի շարք մարդասիրական հարցեր։