«Հրապարակ»․ Գյումրին մերժում է ՔՊ-ին եւ պատրաստվում ընտրություններին
Wed, 04 Mar 2026 10:15:53 +0400
Առաջիկա խորհրդարանական ընտրությունները սարերի հետեւում չեն։ Թեեւ առերեւույթ դեռ ժամանակ կա, սակայն քաղաքական ուժերն արդեն մտել են վերադասավորումների եւ քարոզարշավի փուլ։ Անսպասելիորեն որոշ քաղաքական ուժեր հայտարարեցին ընտրություններին չմասնակցելու մասին, մի քանիսն էլ բավական անհավանական կոալիցիաներ կազմեցին: Մի մասը շարունակում է լռություն պահպանել՝ հաշվարկելով հնարավոր քաղաքական զարգացումները եւ հապաղելով։
«Հայրենիք» կուսակցության նախագահ Արթուր Վանեցյանն օրերս հայտարարեց ընտրություններին չմասնակցելու մասին՝ պատճառաբանելով, թե չեն ցանկանում իրենց մասնակցությամբ փոշիացնել ընդդիմության ձայները։ Նա նաեւ ընտրողներին առաջարկեց ակտիվ լինել եւ իրենց ձայնը տալ նախընտրած քաղաքական ուժին։
Մեր տեղեկություններով՝ Արթուր Վանեցյանի թիմակից` «Պատիվ ունեմ» դաշինքով Շիրակի մարզից պատգամավոր ընտրված, ապա ավագանու ընտրություններում հաղթանակ տարած Մարտուն Գրիգորյանն ընտրություններին պատրաստվում է մասնակցել` համագործակցելով Գագիկ Ծառուկյանի հետ։ Ի դեպ, այդ զարգացումը կարող է անակնկալի բերել ոչ միայն Գյումրու բնակիչներին, այլեւ ընդդիմադիր քաղաքական դաշտին։ Մարտուն Գրիգորյանը քաղաքում ունի զգալի ընտրազանգված եւ հեղինակություն։ Ի դեպ, նա ԱԺ պատգամավոր է եղել 2007-ի ընտրությունների արդյունքում, իսկ 2009-ին դարձել է «Բարգավաճ Հայաստան» կուսակցության անդամ։ Նա մինչեւ 2015 թվականը եղել է ԲՀԿ անդամ եւ ղեկավարել է կուսակցության Շիրակի մարզային խորհուրդը։ Կուսակցությունից դուրս գալու պահին էլ հայտարարել է. «Ես դուրս եմ գալիս «Բարգավաճ Հայաստան» կուսակցության շարքերից` պահպանելով ընկերական հարաբերություններ Գագիկ Ծառուկյանի եւ ԲՀԿ-ական գործընկերներիս հետ»։ Իսկ 2021-ին մտել է Սերժ Սարգսյանի եւ Արթուր Վանեցյանի «Պատիվ ունեմ» դաշինքի ցուցակ:
Միաժամանակ նշենք, որ Ծառուկյանի թիմակիցներն ու նրան հարող որոշ շրջանակներ քաղաքում արդեն իսկ ակտիվ աշխատանքներ են իրականացնում։ Ըստ տեղեկությունների՝ «Բարգավաճ Հայաստան» կուսակցությունը կամ «Առաջարկ Հայաստանին» նախաձեռնությունը, որով այժմ հանդես է գալիս Ծառուկյանը, Գյումրիում նոր դաշնակիցներ եւ թեկնածուներ ներգրավելու ծրագրեր ունի:
Այս պարագայում ուշագրավ է նաեւ քաղաքապետ Վարդան Ղուկասյանի թիմակիցների դիրքորոշումը։ Թեեւ Ղուկասյանը կալանավորված է, եւ նրա մերձավորները, թիմակիցները դեռեւս չեն հայտարարել ընտրություններին մասնակցելու մասին, սակայն հայտնի է, որ նրան հաճախ դիտարկում են որպես ՀՀ երկրորդ նախագահ Ռոբերտ Քոչարյանի առաջնորդած «Հայաստան» դաշինքին հարող ուժ, եւ հնարավոր է քոչարյանական ուժի հետ համագործակցությունը նաեւ հունիսի 7-ի ընտրություններում։ Չի բացառվում, որ Ղուկասյանի թիմի որոշ ներկայացուցիչներ միանան այդ քաղաքական ձեւաչափին, անգամ եթե նա շարունակի մնալ բանտում։
Իսկ ահա նախկին քաղաքապետ Սամվել Բալասանյանի թիմակիցները թեեւ ընդհատակում են եւ քաղաքական դաշտում բավական պասիվ, այնուամենայնիվ, տեղեկություններ կան, որ նրանցից մի քանիսն այս օրերին փորձել է բանակցություններ վարել տարբեր քաղաքական ուժերի, այդ թվում՝ Սամվել Կարապետյանի նորաստեղծ «Ուժեղ Հայաստան» կուսակցության ներկայացուցիչների հետ։ Նկատենք, որ, ընդհանուր առմամբ, Գյումրու քաղաքական դաշտում եւս վերադասավորումներ են ընթանում, եւ տարբեր անձինք ու ուժեր փորձում են դիրքավորվել առաջիկա ընտրական գործընթացին ընդառաջ։
Այն, որ այս ընտրությունները լինելու են առանձնահատուկ, միանշանակ է։ Քաղաքական գնահատականների համաձայն՝ Գյումրիում ներկայում քննարկվող թեկնածուները հիմնականում նախկին քաղաքական կառույցների հետ կապ ունեցող եւ որոշակի ռեսուրսներ տնօրինող անձինք են, եւ ընդդիմադիր դաշտի համախմբման դեպքում իշխանության հաղթելու հնարավորությունները նվազ են լինելու։ Մանավանդ գյումրեցիների, Գյումրու քաղաքապետի եւ Շիրակի թեմի առաջնորդի նկատմամբ ՔՊ-ի եւ ուժայինների կիրառած տեռորի արդյունքում մարդիկ հակված են աջակցել ընդդիմությանը: