Նոր ի՞նչ համաձայնագիր է կնքվել
Thu, 05 Mar 2026 12:07:20 +0400
Կառավարությունը մարտի 5-ին կայացած նիստում հավանություն է տվել Հայաստանի և Ղազախստանի կառավարությունների միջև ռազմական հետախուզության ոլորտում համագործակցության մասին համաձայնագրին։
Հիմնավորման մեջ նշվում է, որ երկու երկրների հարաբերություններն ունեն զարգացման զգալի ներուժ։ Այդ համագործակցությունը պայմանավորված է ինչպես Հավաքական անվտանգության պայմանագրի կազմակերպության շրջանակներում անդամակցությամբ, այնպես էլ երկկողմ հարաբերությունների ակտիվությամբ և տարբեր տարածաշրջանային ու միջազգային կառույցներում համատեղ աշխատանքով։
Փաստաթղթում ընդգծվում է, որ Հայաստանի և Ղազախստանի պաշտպանական գերատեսչությունների միջև ձևավորված է արդյունավետ համագործակցություն և կառուցողական երկխոսություն։
Ռազմական հետախուզության ոլորտում համագործակցությունը նպատակ ունի ընդլայնել երկկողմ կապերը մի շարք ուղղություններով։ Մասնավորապես, նախատեսվում է ստեղծել իրավական հիմք երկու երկրների ռազմական հետախուզական կառույցների համագործակցության համար, իրականացնել տեղեկատվության և վերլուծությունների փոխանակում ազգային անվտանգության հարցերի վերաբերյալ, ինչպես նաև համագործակցել տեխնոլոգիական ոլորտում։
Բացի այդ, համաձայնագիրը նախատեսում է տեղեկատվության փոխանակում ահաբեկչական և ծայրահեղական կազմակերպություններին հակազդելու նպատակով, ինչպես նաև փոխադարձ հետաքրքրություն ներկայացնող ռազմաքաղաքական գործընթացների վերաբերյալ տվյալների փոխանցում։