«Հրապարակ». ՔՊ-ականը ստում է

Fri, 06 Mar 2026 08:30:19 +0400

«Հայաստան» խմբակցության պատգամավոր Արման Ղազարյանը մարտի 4-ին կրկին բարձրաձայնեց պաթոլոգիա-անատոմիական լաբորատորիաների խնդիրների մասին։ Ղազարյանն ընդգծեց, որ այս խնդիրը, Վարդենիսից բացի, վերաբերում է նաեւ Ճամբարակ համայնքին։ Նրա խոսքով՝ քաղաքացիները Ճամբարակից ստիպված են դիակները տեղափոխել Սեւան, ինչն իրենց վրա զգալի ֆինանսական, ֆիզիկական եւ ժամանակային բեռ է դնում։ ՔՊ-ական պատգամավոր Նարեկ Գրիգորյանն էլ, անդրադառնալով Գեղարքունիքի մարզում դիահերձարանների խնդրին, ԱԺ ամբիոնից հայտարարեց. «Անցած տարի ընդդիմությունը շահարկում էր Սեւանի դիահերձարանի հարցը, հիմա դրա մասին էլ չի խոսվում, այդ հարցը չի շահարկվում, քանի որ կառավարությունն այդ հարցը լուծել է՝ կառուցեց, վերակառուցեց դիահերձարանը»: Քանի որ Նարեկ Գրիգորյանը մեր զանգերը թողեց անպատասխան, ուզում ենք հրապարակային հարց ուղղել ՔՊ-ական պատգամավորին. վերջին անգամ ե՞րբ է եղել Սեւան քաղաքում, իր աչքով տեսե՞լ է կառավարության կառուցած դիահերձարանը:

Իրոք, Սեւան քաղաքում դիահերձարան կառուցելու նախագիծ կա, սակայն դեռ որեւէ շինարարական աշխատանք չի կատարվել: Սեւանի նախկին հիվանդանոցի տարածքում գործում է հին դիահերձարանը, իսկ նոր դիահերձարան պետք է կառուցվի Սեւանի հոգեկան առողջության կենտրոնի հարեւանությամբ: Գեղարքունիքի մարզի դատաբժշկական փորձագետ Սահակ Ավետիսյանը մեզ հետ զրույցում ասաց. «Դիահերձարանը նախագծման, նախահաշվարկային փաստաթղթաշրջանառության փուլում է, դիահերձարանը կառուցված չէ, բայց ընթացքի մեջ է: Նախատեսվում է կառուցել երկհարկանի բազմապրոֆիլ եւ սառնարաններով կահավորված դիահերձարան»: