Լուսնի վրա հնարավոր է ուտելի մշակաբույսեր աճեցնել
Fri, 06 Mar 2026 22:00:20 +0400
Տեխասի համալսարանի գիտնականները կարողացել են հաջողությամբ աճեցնել սիսեռ լաբորատոր պայմաններում ստեղծված լուսնային հողային ապարի իմիտացիայում։ Նրանք նույնիսկ կատարել են այդ աճեցված սիսեռի «բերքահավաքը»։ Այս մասին հայտնում է Science X պարբերականը։ Սա առաջին դեպքն է, երբ նման գիտափորձը հաջող ավարտ է ունեցել։ Գիտնականները փորձում են հասկանալ, թե արդյոք ապագայում՝ լուսնային առաքելություններ իրականացնելիս հնարավոր կլինի այնտեղ ուտելի մշակաբույսեր աճեցնել, որոնցով կկարողանան սնվել նաեւ տիեզերագնացները։ Այսպիսի գիտափորձերը նաեւ օգնում են հասկանալու, թե որքանով Լուսնի հողային ապարները «պիտանի» կարող են լինել գյուղատնտեսական նշանակության կուլտուրաների աճեցման համար։
Լուսնային հողային ապարի իմիտացիան ստանալու համար գիտնականները օգտագործել են այն փորձանմուշները, որոնք բերվել էին Լուսնից՝ «Ապոլլոն» առաքելության ժամանակ։ Ի դեպ, իտալական մամուլն էլ անցյալ տարի գրել էր, որ իտալացի գիտնականներն էլ կարողացել են մշակել «տիեզերական բրնձի» սորտ, որը աճեցվելու է Լուսնի կամ Մարսի վրա ապագայում ստեղծվելիք մարդկային գաղութների բնակիչների կողմից։