Ի՞նչ են թաքցնում Պապիկյանն ու Փաշինյանը. բողոքի ակցիա
Tue, 10 Mar 2026 11:59:59 +0400
«Միասնության թևեր» կուսակցության ներկայացուցիչները, ինչպես հայտնի է,պնդում են, որ Ադրբեջանը ներխուժումներ է իրականացրել Հայաստանի սուվերեն տարածք։ Այս մասին հերթական հայտարարությունն է արել կուսակցության անդամ Նարեկ Պարոնյանը՝ Հայաստանի Հանրապետության պաշտպանության նախարարության շենքի դիմաց կազմակերպված բողոքի ակցիայի ընթացքում։
Պարոնյանի խոսքով՝ օրեր առաջ կուսակցության ղեկավար Արման Թաթոյանը հրատապ մամուլի ասուլիս էր հրավիրել և ներկայացրել ուսումնասիրությունների արդյունքները, որոնց համաձայն՝ ադրբեջանական կողմը հերթական անգամ առաջխաղացում է ունեցել Հայաստանի տարածքում։ Նա նշել է, որ կուսակցությունն ունի փաստաթղթեր և արբանյակային լուսանկարներ, որոնք, ըստ նրանց, ապացուցում են այդ ներխուժումները։
Նարեկ Պարոնյանը լրագրողներին ներկայացրել է համապատասխան նյութերը և հայտնել, որ դրանք պատրաստվում են փոխանցել Պաշտպանության նախարարությանը՝ պահանջելով պարզաբանում, թե ինչու պետական կառույցները չեն տեղեկացրել հասարակությանը հնարավոր ներխուժումների մասին։
Նրա ներկայացմամբ՝ ադրբեջանական ստորաբաժանումները առաջխաղացում են ունեցել Վարդենիսի տարածաշրջանում, որտեղ, ըստ նրա, կառուցվել են դիրքեր և իրականացվել են ամրաշինական աշխատանքներ։ Պարոնյանը պնդում է, որ այդ տարածքներում փորվել են խրամատներ և ստեղծվել են ռազմական դիրքեր, որոնք հնարավորություն են տալիս վերահսկել շրջակա տարածքները։
Նրա խոսքով՝ ներկայացված լուսանկարներից երևում է, որ մինչև 2025 թվականի հուլիսի 31-ը այդ դիրքերը գոյություն չեն ունեցել։ Ըստ նրա՝ իրականացված շինարարական աշխատանքների արդյունքում վերահսկողության տակ են հայտնվել Վարդենիսի տարածաշրջանի որոշ հատվածներ, այդ թվում՝ Սոթքի հանքի տարածքը, ինչպես նաև հարակից գյուղերը, ճանապարհները և արոտավայրերը։
Պարոնյանը նաև նշել է, որ իրենց տվյալներով՝ 2025 թվականի ընթացքում Հայաստանը տարածքային կորուստներ է ունեցել ոչ միայն Վարդենիսի շրջանում, այլև Ջերմուկի ուղղությամբ։ Նրա խոսքով՝ ներկայացված փաստերը հակասում են վարչապետ Նիկոլ Փաշինյանի և պաշտպանության նախարար Սուրեն Պապիկյանի այն հայտարարություններին, թե նշված ժամանակահատվածում Հայաստանը տարածքներ չի կորցրել։
«Փաստերն ապացուցում են, որ Ադրբեջանը կտոր- կտոր ներխուժում է Հայաստան, վերցնում է մեր հայրենիքի տարածքները, իսկ այս իշխանությունները ստում են»,- նշել է նա: