ՀՀ քննչական կոմիտեն հաղորդում է, որ 2025 թվականի ընթացքում ընտանեկան բռնության դեպքերի վերաբերյալ քննվել է 2.398 քրեական վարույթ (2024-ին՝ 2.207), որից 630-ը փոխանցվել է 2024 թվականից: 2025 թվականին 157 քրեական վարույթ է քննվել՝ 159 անձի վերաբերյալ եւ մեղադրական եզրակացությամբ ուղարկվել դատարան (2024-ին՝ 197 վարույթ՝ 195 անձ):

Ինչպես տեսնում ենք, ընտանեկան բռնության դեպքերը 2025-ին էապես աճել են, նախորդ տարվա համեմատ: Բայց թվերն աճել են ոչ միայն ընտանեկան բռնության դեպքերով, այլ նաեւ անչափահասների կողմից կատարված հանցագործությունների մասով։
Քննչական կոմիտեի հրապարակած տվյալների համաձայն` 2025 թվականի ընթացքում քննվել է անչափահասների կողմից կատարված հանցագործությունների 464 վարույթ, իսկ 2024 թվականին՝ եղել է ընդամենը 444 վարույթ։ 464 քրեական վարույթից 80-ը՝ 92 անչափահասի վերաբերյալ մեղադրական եզրակացությամբ ուղարկվել է դատարան (2024-ին՝ 60 քրեական վարույթ՝ 78 անձի վերաբերյալ), դրանցից միայն 1-ով է դատավճիռ կայացվել, իսկ 177-ը կարճվել են (2024-ին՝ 163 էին կարճվել)։