Անվտանգության հայեցակարգ է մշակել, որը, սակայն, Փաշինյանին չեն տա

Fri, 13 Mar 2026 13:00:40 +0400

«ՀայաՔվե» ազգային քաղաքացիական միավորումը ներկայացրել է Հայաստանի ազգային անվտանգության նոր ռազմավարության հայեցակարգային նախագիծը։ Միավորման համակարգող Ավետիք Չալաբյանը ասուլիսի ընթացքում նշեց, որ գործող ռազմավարական փաստաթուղթն այլևս չի համապատասխանում ներկայիս իրողություններին, ուստի անհրաժեշտ է մշակել նոր մոտեցումներ։

Չալաբյանի խոսքով՝ իշխանությունները հասարակությանը փորձում են համոզել, թե տարածաշրջանում սկսվել է խաղաղության շրջան, և պետությունը պետք է պարզապես օգտվի այդ իրավիճակից։ Սակայն, ըստ նրա, իրականությունն այլ է, քանի որ տարածաշրջանում շարունակվում են լուրջ աշխարհաքաղաքական զարգացումներ, որոնք կարող են ազդեցություն ունենալ նաև Հայաստանի վրա։

Նա հիշեցրեց, որ Հայաստանի ազգային անվտանգության գործող ռազմավարությունն ընդունվել է դեռևս 2007 թվականին, իսկ 2020 թվականին ներկայացվել էր նոր տարբերակ, որը, նրա խոսքով, կորցրել է իր արդիականությունը այն իրադարձություններից հետո, որոնք տեղի ունեցան նույն թվականին տարածաշրջանում։

Չալաբյանը նշեց, որ նոր փաստաթղթի մշակմանը մասնակցել են բազմաթիվ մասնագետներ։ Նախագծի հիմնական նպատակն է հանրությանը ներկայացնել առաջարկվող մոտեցումները, լսել տարբեր կարծիքներ, կատարել լրացումներ և վերջնական տարբերակը ներկայացնել ապագայում ձևավորվելիք իշխանություններին՝ որպես հնարավոր հիմք ազգային անվտանգության նոր ռազմավարության մշակման համար։

Նրա խոսքով՝ գործող իշխանություններին փաստաթուղթը ներկայացնելու անհրաժեշտություն չեն տեսնում, քանի որ, ըստ իրենց գնահատականի, իշխանությունները գործում են առանց հստակ ռազմավարական հայեցակարգի։

Փաստաթղթի մշակմանը մասնակցած ռազմարդյունաբերության կոմիտեի նախկին նախագահ Ավետիք Քերոբյանը նշեց, որ աշխատանքը տևել է մոտ մեկ տարի։ Այդ ընթացքում ուսումնասիրվել է նաև այլ երկրների փորձը և իրականացվել ռազմավարական վերլուծություն։

Վերլուծության արդյունքում առանձնացվել են Հայաստանի հիմնական արտաքին սպառնալիքները, որոնց շարքում նշվել են Թուրքիան և Ադրբեջանը։ Ներքին մարտահրավերների թվում ընդգծվել են պաշտպանական համակարգի թուլացումը, ժողովրդագրական խնդիրները, կրթական համակարգում արժեքային ճգնաժամը, ազգային ինքնության խոցելիությունը և տնտեսական անվտանգության հետ կապված հարցերը։

Նախագծում ձևակերպվել են նաև Հայաստանի ազգային շահերը։ Դրանց թվում նշվում են անվտանգ և կայուն պետության զարգացումը, ինքնիշխանության պաշտպանությունը, հանրային համերաշխության ապահովումը, ճգնաժամերին դիմակայելու կարողության բարձրացումը, մրցունակ և ինքնաբավ տնտեսության ձևավորումը, ազգային ռեսուրսների կենտրոնացումը երկրի ներսում, սփյուռքի հետ կապերի խորացումը, ինչպես նաև Հայ առաքելական եկեղեցու դերի ամրապնդումը։

Փաստաթղթում անդրադարձ կա նաև Հայաստանի, արցախահայության, ինչպես նաև Նախիջևանի և արևմտահայության իրավունքների պաշտպանության հարցերին, ինչպես նաև միջազգային համագործակցության և խաղաղության նոր մակարդակի ձևավորման անհրաժեշտությանը։