Փաշինյանի իշխանության մայրամուտն է հիմա

Sun, 15 Mar 2026 16:45:10 +0400

ՀՀ վարչապետ Նիկոլ Փաշինյանը «Քաղաքացիական պայմանագիր» կուսակցության անդամների հետ Սյունիքի մարզում է, երեկ նրանք Սիսիանում էին, այսօր՝ Տաթևում: Փաշինյանը շրջում է բակերում, շփվում քաղաքացիների հետ, հետաքրքրվում նրանց խնդիրներով, կառավարության ծրագրերի, աջակցությունների արդյունքներով: Լավաշ է խժռում։ Թոշակառուներից նա հետաքրքրվում է կենսաթոշակի բարձրացման, առողջության ապահովագրության մասին, ուսուցիչներից՝ ատեստավորման արդյունքներից։ Վարչապետն իրեն մոտեցած թոշակառու պապիկին հորդորեց առևտուրն անել անկանխիկ, ինչի արդյունքում նրա կենսաթոշակը 48 հազար դրամի փոխարեն կդառնա գրեթե 70 հազար դրամ: Փաշինյանը մտավ նաև բնակելի շենք, թակեց դռներ՝ քաղաքացիների հետ անձամբ շփվելու համար: Տարեց մի բնակչից հետաքրքրվեց, թե արդյոք օգտվում է առողջության ապահովագրության շրջանակում մատուցվող ծառայություններից: Տարեց տղամարդն ասաց, որ բժշկական կենտրոն հասնելու դժվարություն ունի: Առողջապահության նախարար Անահիտ Ավանեսյանն ասաց, որ կարող են բժշկի տնային այց ձևակերպել, բժիշկն անձամբ կմոտենա: Նախարարն անձամբ վերցրեց տարեց տղամարդու հեռախոսահամարը, որ բժիշկը կապվի նրա հետ: Նա նկատեց, որ թակած գրեթե բոլոր դռների բնակիչները կառավարության սոցիալական ծրագրերի շահառուներ են՝ թոշակառուներ, առողջության ապահովագրության շահառուներ, երեխայի ծննդյան նպաստ ստացող: Քաղաքացիներն իրենց տարբեր հարցերով մոտենում են վարչապետին: Փաշինյանի հետ շրջում է նաև Սյունիքի մարզպետ Ռոբերտ Ղուկասյանը: Եվ այս ամենը նշանակում է, որ ընտրություններից ամիսներ առաջ իշխանությունը նախընտրական քարոզարշավ է իրակացնում և ընտրակաշառք է բաժանում, որովհետև ընտրակաշառք են համարվում նաև ծառայությունների մատուցումը և խոստումները: Այսինքն, իշխանություն հանդիսացող ՔՊ-ն և ընդդիմադիր ուժերը շատ անհավասար պայմաններում են գնում ընտրությունների:

Նիկոլ Փաշինյանի մանիպուլյացիաների և պարզունակ քարոզչության մասին «Հրապարակի» հետ զրույցում իր գնահատականներով կիսվեց հոգեբան Միհրդատ Մադաթյանը։ Նա մեզ հետ զրույցում ասաց․ «Փաշինյանը սցենար է գծել։ Նրա ամուսնալուծության հայտարարությունը, որը շաբաթներ առաջ արեց նրա գործընկերը՝ Աննա Հակոբյանը, իրականում բնավ ամուսնալուծության մասին չէր։ Նիկոլ Փաշինյանին պետք էր լքված տղամարդու կերպարը։ Նա մտել է խրոնիկ սովածի դերի մեջ, անդադար սոված է, աջուձախ միայն խժռում է։ Այս մարդիկ փորձում են ուրախ ավտոբուսի մեջ իմիտացիա ստեղծել, թե իբրև շատ հասարակ ենք իրենք։

Պապիկյանը առաջարկեց սուջուխ ուտել այս անգամ, դրանից առաջ նա կերավ կարկանդակ ու կուկուրուզ՝ փնթի ձևով, լավաշ կերան և այլն։ Եկեք ֆիքսենք, որ այս նախընտրական քարոզարշավը օրենքի կոպիտ խախտումներով է ընթանում, ինչը փաստում է մի բան՝ Նիկոլ Փաշինյանը մեծ մտավախություն ունի, որ իր վարկանիշը անգամ իր պատկերացումներին մոտ էլ չի։ Նա փորձում է իր գահավիժած ռեյտինգը բարձրացնել։ Փաշինյանի իշխանության մայրամուտն է հիմա։ Գորբաչովի ցիլինդրով քարոզարշավը ևս շատ նման է իշխանության ավարտի։ Նրա հակահիգիենիկ տեսարանները, բեմադրված զրույցները հուշում են մի բան՝ ՔՊ-ական իշխանությունը չունի վարկանիշ։ Ի դեպ՝ ուրախ ավտոբուս են անվանում հոգեբուժարան տեղափոխող ավտոբուսները»։