Նոր Նորքի նախկին թաղապետ Տիգրան Տեր-Մարգարյանի եւ ակտիվիստ Արթուր Չախոյանի ու Մեսրոպ Մանուկյանի վերաբերյալ քրեական գործը նախորդ տարվա օգոստոսից դատարանում է՝ դատավոր Սաթենիկ Անդրեասյանի վարույթում։

Հիշեցնենք, որ 2025-ի ապրիլի 29-ին ակտիվիստ Արթուր Չախոյանն ու Երեւանի ավագանու «Մայր Հայաստան» խմբակցության անդամ Մեսրոպ Մանուկյանը բողոքի ակցիա էին իրականացրել թաղապետարանի մոտ` յոգուրտ լցնելով թաղապետի նկարի վրա, որը դրանից առաջ մասնավոր հեռախոսազրույցում հայհոյել էր նրանց: Հաջորդ օրը` ապրիլի 30-ին, Արթուր Չախոյանը գնացել էր Նոր Նորք վարչական շրջան` հանրային քննարկման մասնակցելու, որի ժամանակ թաղապետի կողմնակիցները` Տեր-Մարգարյանի ակտիվ մասնակցությամբ, ծեծել էին նրան` հենց տեսախցիկների առաջ: Տիգրան Տեր-Մարգարյանը, որը «Հանրապետություն» կուսակցության անդամ է, հետո նշել էր, որ լավ է արել, որ հայհոյել է եւ ծեծել, եւ նրան պաշտպանել էին իր կուսակիցները: Բայց հանրային ճնշման ներքո իրավապահները ստիպված էին քրեական գործ հարուցել: Ընդ որում, 2 գործ հարուցվեց․ մեկը՝ ակտիվիստների նկատմամբ, մյուսը` ծեծողների: Երեւանի քաղաքապետարանից, անդրադառնալով տեղի ունեցածին, նշել էին, որ բռնությունը՝ ցանկացած դրսեւորմամբ, անընդունելի է, ընդ որում՝ բռնությունը միայն ֆիզիկականը չէ: Միջադեպից հետո Արթուր Չախոյանի աչքի տակ կապտուկ կար, եւ դեմքին՝ արյունազեղման նշաններ:

Նշենք, որ բոլոր վեց մեղադրյալների, այդ թվում՝ Տիգրան Տեր-Մարգարյանի, Արթուր Չախոյանի եւ Մեսրոպ Մանուկյանի նկատմամբ որպես խափանման միջոց էր կիրառվել բացակայելու արգելքը։ Մենք հետաքրքրվեցինք, թե ինչ փուլում է գործը: Մեսրոպ Մանուկյանը «Հրապարակ»-ի հետ զրույցում ասաց, որ գործով նիստեր են տեղի ունենում, հասել են դատարանում վկաների հարցաքննության փուլին, առաջիկայում հարցաքննվելու է «Հանրապետություն» կուսակցությունից Անի Խաչատրյանը․ «Ինքը ցուցմունք է տվել, հարցաքննվելու է այդ ցուցմունքի շրջանակում: Իմ գնահատմամբ՝ ինքը սուտ, շառլատան բաներ է արել, սուտ բաներ է խոսել, այդ փուչիկը դատարանում կտրաքի, բայց «Հանրապետություն» կուսակցության ներկայացուցչի համար դա նորմալ երեւույթ է։ Հարցաքննվելու են նաեւ թաղապետարանի աշխատողները, որոնք Արթուրի հետ են եղել»։

– Ինչպե՞ս են նիստերն անցնում` նորմա՞լ մթնոլորտում։

– Նորմալը ո՞րն է, այդ մարդիկ գնացել, գրել են իմ վրա, որ ես յոգուրտ չեմ լցրել, ուրիշ բան եմ լցրել իրենց դեմքին, բայց քաղաքակիրթ աշխարհում նման ակցիաներ իրականացվում են, չգիտեմ՝ այդ մարդիկ իրենց ինչի են ստորացված զգացել, զգացե՞լ են, թե՞ չէ, այդ պահը չի եղել, որ հասկանամ՝ իմ գործով տուժածն իրեն ինչքան է ստորացված զգացել։

– Եթե յոգուրտ չէ, բա իրենք ի՞նչ են ասում` ի՞նչ եք լցրել։

– Այդ հարցն իրենց տվեք, եթե ինձ հարցնում եք, ես ասում եմ՝ յոգուրտ եմ լցրել, իրենք չգիտեմ ինչ են պատկերացնում, դա իրենց երեւակայությունն է, երեւի ինչ-որ մանկական տրավմաներ ունեն, դրա հետ է ասոցացվում։ Ես ամենայն պատասխանատվությամբ ասում եմ՝ յոգուրտ եմ լցրել։