Մահացել է Ուկրաինայի Ուղղափառ եկեղեցու ինքնահռչակ պատրիարքը
Fri, 20 Mar 2026 18:00:00 +0400
97 տարեկանում մահացել է Ուկրաինայի Ուղղափառ եկեղեցու երբեմնի ղեկավար Ֆիլարետ Դենիսենկոն։ Հիշեցնենք, որ պաշտոնապես նա ներկայումս համարվում է կարգալույծ հռչակված՝ եկեղեցական ապստամբություն բարձրացնելու, Ուկրաինական Ուղղափառ եկեղեցում պառակտում սերմանելու եւ ինքնահռչակ Կիեւի պատրիարքություն հաստատելու համար։ Ֆիլարետ Դենիսենկոն կապված է Ուկրաինայի քաղաքական պատմության վերջին երեք տասնամյակների հետ։ Եղել է Ռուս Ուղղափառ եկեղեցու պատրիարքության թեկնածու, սակայն պարտություն է կրել եւ ընտրվել է պատրիարք Ալեքսիյ 2-րդը։ Այդ ժամանակվանից սկսած՝ լինելով Մոսկվայի պատրիարքության հոգեւոր խնամատարության եւ ենթակայության ներքո գտնվող Ուկրաինայի Ուղղափառ եկեղեցու էքզարխը, փորձել է հասնել այն բանին, որ դառնա Կիեւի պատրիարք։ Կարգալույծ է հռչակվել Ռուս Ուղղափառ եկեղեցու Սրբազան Սինոդի որոշմամբ՝ եկեղեցական ապստամբություն բարձրացնելու համար։ Ժամանակին հալածել է Մոսկվայի պատրիարքությանը հավատարիմ եկեղեցականներին Ուկրաինայի տարածքում։ Ուշագրավ է այն, որ Պետրո Պորոշենկոյի նախագահության տարիներին թեեւ Կոստանդնուպոլսի «տիեզերական» կոչված պատրիարքը «Տումար» էր շնորհել Ուկրաինայի Ուղղափառ եկեղեցուն, սակայն այդպես էլ Ուղղափառ աշխարհում Ֆիլարետին որպես պատրիարք ոչ մեկը չի ճանաչում։ Այդ «Տումարի» պատճառով էլ ներկայումս խզված են Մոսկվայի եւ Կոստանդնուպոլսի Պատրիարքական Աթոռների միջեւ հարաբերությունները։