Արշիլ Գորկու թոռը ֆիլմ է նկարահանել պապի մասին
Fri, 20 Mar 2026 23:00:31 +0400
Բրիտանա-իտալական ռեժիսոր Կոզիմա Սփենդերը վավերագրական ֆիլմ է նկարահանել, որը նվիրված է իր պապին՝ աշխարհահռչակ նկարիչ Արշիլ Գորկուն՝ հայտնել է «Ալֆանյուզը»։ Ֆիլմը նկարահանվել է հատուկ ցուցահանդեսի համար, որը բացվել է Լոս Անջելեսի Hauser & Wirth պատկերասրահում եւ կգործի մինչեւ ապրիլի 25-ը: Arshile Gorky: Horizon West (2026) 23 րոպեանոց վավերագրական ֆիլմը պատմում է 1941 թվականի ամռանը Արշիլ Գորկու՝ Նյու Յորքից Կալիֆորնիա կատարած ճանապարհորդության մասին, որտեղ նրան ուղեկցում էին ապագա կինը՝ Ագնես «Մուգուշ» Մագրուդերը, եւ ճապոնացի նկարիչ Իսամու Նոգուչին։ Ֆիլմը ստեղծել է Կոզիմա Սփենդերը՝ Peacock Pictures ծառայության, «Արշիլ Գորկի» հիմնադրամի աջակցությամբ եւ Hauser & Wirth պատկերասրահի հետ համագործակցությամբ: Արշիլ Գորկին (Ոստանիկ Ադոյան) ամերիկահայ նկարիչ է, աբստրակտ էքսպրեսիոնիզմի հիմնադիրներից:
Նա 20-րդ դարի ամենաազդեցիկ ամերիկացի նկարիչներից է. նրա կտավները ցուցադրված են ԱՄՆ-ի բոլոր խոշորագույն պատկերասրահներում, ինչպես նաեւ՝ Լոնդոնի «Թեյթ» պատկերասրահում: Գորկին ծնվել է հայկական ընտանիքում՝ Վան քաղաքի մոտ գտնվող Խորգոմ գյուղում: 1915 թվականին՝ Հայոց ցեղասպանության ժամանակ, մոր եւ երեք քույրերի հետ գաղթել է Էջմիածին, հետո տեղափոխվել Երեւան։ Մոր մահանալուց հետո Գորկին 1920 թվականին արտագաղթել է ԱՄՆ: Նա փոխել է իր անունը՝ դարձնելով Արշիլ Գորկի՝ ի պատիվ սիրելի գրող Մաքսիմ Գորկու: