Թուրքիայում մի շարք հայտնիներ ձերբակալվել են թմրանյութի օգտագործման կասկածանքով
Wed, 25 Mar 2026 17:00:57 +0400
Ստամբուլում թմրանյութի դեմ պայքարի շրջանակներում իրականացված օպերացիայի ընթացքում թուրք իրավապահները ձերբակալել են մի շարք հայտնի անձանց։ Նրանց թվում են թուրքական «Բեշիքթաշ» ֆուտբոլային ակումբի նախկին նախագահ Ֆիքրեթ Օրմանը և գործարար Հաքան Սաբանջըի։
Տվյալ գործի շրջանակում, Սաբանջըի եղբայրը՝ Քերիմ Սաբանջըն, ձերբակալվել է Ստամբուլի օդանավակայանում՝ արտերկրից Թուրքիա վերադառնալիս։ Ձերբակալվածների թվում է նաև մոդել Գյուզիդե Դուրանը։
Ըստ տեղեկությունների՝ քննության շրջանակում ձերբակալման որոշում է կայացվել նաև թուրքական «Գալաթասարայ» ֆուտբոլային ակումբի նախկին նախագահ Բուրաք Էլմասի, դերասանուհի Հանդե Էրչելի և մոդել Դիդեմ Սոյդանի նկատմամբ։
Իրավապահ մարմինների փոխանցմամբ՝ օպերացիան իրականացվում է թմրանյութերի ձեռքբերման և օգտագործման վերաբերյալ կասկածների հիման վրա, գրում է Ermenihaber-ը։
Գործով քննությունը շարունակվում է, և չեն բացառվում նոր ձերբակալությունները: