2024թ․ մայիսի 27-ի ջրհեղեղը մեծ վնասներ պատճառեց մարդկանց եւ տնտեսությանը՝ ավերածություններ գործեց, ինչի հետեւանքով Լոռու եւ Տավուշի մարզերում 2-ական զոհ եղավ։ 2026թ․ մարտի 17-ին Տավուշի մարզպետ Հայկ Ղալումյանին տեղեկատվական հարցում եմ արել․ «2024թ․ մայիսի 27-ի ջրհեղեղից տուժած ֆիզիկական եւ իրավաբանական անձանց պետական աջակցությունն ավարտվե՞ց, թե՞ շարունակվելու է։ Եթե շարունակվելու է՝ ե՞րբ, ո՞ւմ է այն տրվելու։ Ջրհեղեղից տուժածներին մինչեւ հիմա որքա՞ն ֆինանսական աջակցություն է տրվել»։

Մարզպետի աշխատակազմից պատասխանել են․ «2024թ․ մայիսի 27-ի դրությամբ ջրհեղեղից տուժած ֆիզիկական եւ իրավաբանական անձանց աջակցության հետ կապված՝ հանրապետական հանձնաժողովին ներկայացված ակտով անհատական բնակելի տներին պատճառված ընդհանուր վնասի գումարը՝ վերանորոգման, առաջնային գույքի եւ բնակարանի գնման վկայագրի համար, կազմել է 89 մլն 702 հազար 900 դրամ։ Վնասվել է 32 տրանսպորտային միջոց, որից 29-ին տրվել է 32,9 մլն դրամ ֆինանսական աջակցություն։ Տուժել է 307 գյուղացիական տնտեսություն։ Նոյեմբերյան համայնքում՝ 292, Դիլիջան համայնքում՝ 15, որոնց փոխհատուցման նպատակով տրված գումարը կազմել է 48 մլն 665 հազար դրամ։ Տուժել է 30 տնտեսվարող, 15-ը՝ Նոյեմբերյանում, 10-ը՝ Դիլիջանում, 5-ը՝ Իջեւանում։ Ոչ բնակելի շինություններին պատճառված վնասի համար ֆինանսական աջակցություն են ստացել Դիլիջան համայնքում 9 շահառու, Նոյեմբերյանում՝ 125։ Ընդհանուր տրվել է 18 մլն 850 հազար դրամ գումար, իսկ երկրորդ փուլով Նոյեմբերյան համայնքի գյուղացիական տնտեսություններին պատճառված վնասի համար տրամադրվել է 412 մլն 58 հազար դրամ։ Միաժամանակ տեղեկացնում եմ, որ շարունակվելու մասին տեղեկատվություն չունենք»։

2024թ․ ջրհեղեղից գրեթե 2 տարի է անցել, սակայն այդ ջրհեղեղից միջպետական ավտոճանապարհի Դիլիջան-Իջեւան հատվածում վնասված ճանապարհաեզրերը չեն վերականգնվել։ Մարտի 5-ին տարածքային կառավարման եւ ենթակառուցվածքների նախարար Դավիթ Խուդաթյանին հարցում եմ արել, թե այդ հատվածների վերականգնումը երբ է իրականացվելու, որքան գումար է նախատեսված այդ նպատակով։ ՏԿԵ նախարարի տեղակալ Ա․ Դարբինյանի ստորագրությամբ ստացված պատասխանում նշված է․ «Մ4 Երեւան-Սեւան-Իջեւան-ՀՀ սահման միջպետական նշանակության ավտոճանապարհի Դիլիջանից մինչեւ Հ-30 ավտոճանապարհի հետ հատման կետ հատվածում ջրհեղեղի հետեւանքով ողողված եւ փլուզված 10 տեղամասերի վերակառուցման աշխատանքներն իրականացվելու են «Մոստ Կոնտրակտ» ՍՊԸ-ի կողմից։ Կառավարության համապատասխան որոշմամբ 526 մլն 518 հազար դրամ միջոցներ են նախատեսվել աշխատանքների կատարման համար, աշխատանքները բարենպաստ եղանակային պայմանների դեպքում կմեկնարկեն»։

2024թ․ մայիսի 27-ի ջրհեղեղից վնասվել, շահագործումից դուրս է եկել Խաշթառակ գյուղի կամուրջը, հիմա կառուցվում է հիմնական նոր կամուրջ։ Մարտի 5-ին նախարար Դ․ Խուդաթյանին հարցում եմ արել․ «Ե՞րբ է սկսվել Խաշթառակ գյուղի հիմնական կամրջի կառուցումը, ո՞ր կազմակերպությունն է այն իրականացնում, ո՞վ է աշխատանքների պատվիրատուն, որքա՞ն գումար է նախատեսված ծրագրով, ի սկզբանե ե՞րբ էր նախատեսված ծրագրի ավարտը, ե՞րբ այն կավարտվի»: ՏԿԵ նախարարի տեղակալ Ա․ Դարբինյանի ստորագրությամբ պատասխան եմ ստացել․ «S-10-26, /Մ4/-Խաշթառակ-Լուսահովիտ տեղական նշանակության ավտոճանապարհի կմ0+050-ում գտնվող փլուզված կամրջի փոխարեն կառուցվում է պողպատե ֆերմաներով նոր մետաղական կամուրջ։ Աշխատանքները մեկնարկել են 2025 թվականին։ Կառուցող ընկերությունը «Թունել Սադ Արիանան» է։ Ավարտը նախատեսվում է 2026 թվականի մայիսին։ Պատվիրատուն ՀՀ տարածքային կառավարման եւ ենթակառուցվածքների նախարարությունն է»։

Նախարարությունը չի պատասխանել այն հարցին, թե որքան գումար է նախատեսված այդ ծրագրով։ «Թունել Սադ Արիանա» ՓԲԸ-ն իրանական շինարարական ընկերություն է, որը հիմնականում զբաղվում է ենթակառուցվածքային խոշոր նախագծերով, այդ թվում՝ ճանապարհների, թունելների եւ հիդրոտեխնիկական կառույցների շինարարությամբ։ Հիմա սարերի ձյունը սկսել է հալվել, առաջիկայում մեծ է վտանգը, որ ձյան հալոցքի ու գարնանային հորդ անձրեւների հետեւանքով Դեբեդ ու Աղստեւ գետերը կարող են վարարել, դուրս գալ հունից, ավերածություններ գործել։ Մինչդեռ 2 տարի առաջվա՝ 2024թ․ մայիսի 27-ի ջրհեղեղի հետեւանքների զգալի մասը դեռ վերացված չէ։