Ամերիկյան Precision Strike Missile (PrSM) հրթիռը փետրվարի 28-ին հարվածել է Իրանի Լամերդ քաղաքի մարզադահլիճին և տարրական դպրոցին, գրել է New York Times-ը։

Պարբերականը նշում է, որ հարված է հասցվել ռազմական համալիրի մոտ գտնվող հաստատություններին։

Իրանի իշխանությունների հաղորդմամբ՝ հարվածի հետևանքով առնվազն 21 մարդ է զոհվել։
Հարվածը տեղի է ունեցել նույն օրը, ինչ Իրանի Մինաբ քաղաքի աղջիկների դպրոցի վրա իրականացրած հարձակումը (զոհվել էր 175 մարդ)։

Պարբերականը փորձագետների հետ միասին վերլուծել է կադրերը և հարվածի հետևանքները՝ գալով այն եզրակացության, որ զենքի բնութագրերը, պայթյունները և հասցված վնասները համապատասխանում են Precision Strike Missile կոչվող փոքր հեռահարության բալիստիկ հրթիռին, որը պայթում է անմիջապես թիրախի վրա՝ մանր վոլֆրամե գնդիկներ նետելով բոլոր կողմերը։
ԱՄՆ Կենտրոնական հրամանատարության (CENTCOM) ներկայացուցիչ կապիտան Թիմ Հոքինսը New York Times–ին հայտարարել է, որ ամերիկյան ուժերը «պատահական հարվածներ չեն հասցնում քաղաքացիական բնակչությանը, ի տարբերություն իրանական ռեժիմի»։