Իրականում ի՞նչ նպատակ ունի զորահանդեսը

Tue, 31 Mar 2026 10:59:12 +0400

ՀՀ Ազգային ժողովի պատգամավոր, ՀՅԴ Հայաստանի ԳՄ ներկայացուցիչ Իշխան Սաղաթելյանը հրապարակել է տեսաուղերձ, որտեղ անդրադարձել է առաջիկայում նախատեսվող զորահանդեսին՝ ներկայացնելով իր գնահատականը դրա նպատակների վերաբերյալ։

Նրա խոսքով՝ իշխանությունները վերջերս հայտարարել են մայիսին զորահանդես կազմակերպելու մտադրության մասին։ Սաղաթելյանը նշել է, որ նման միջոցառումները կարող են կարևոր դեր ունենալ, եթե դրանք միտված են բարձրացնելու ժողովրդի և բանակի մարտական ոգին, ինչպես նաև հստակ ուղերձ հղելու արտաքին թշնամիներին երկրի պաշտպանունակության մասին։

Միաժամանակ, ընդդիմադիր գործիչը համոզմունք է հայտնել, որ տվյալ դեպքում նախաձեռնությունը այլ նպատակ է հետապնդում։ Նրա գնահատմամբ՝ գործող իշխանությունները հաճախ իրենց քաղաքականության մեջ վախի մթնոլորտ են ստեղծում՝ շեշտադրելով արտաքին սպառնալիքները, իսկ նման պայմաններում կազմակերպվող զորահանդեսը, ըստ նրա, չի ծառայում իրական անվտանգության ամրապնդմանը։

Սաղաթելյանը պնդել է, որ ծրագրվող միջոցառումը կրում է նախընտրական բնույթ և ուղղված է հասարակությանը մոլորեցնելու փորձին՝ ստեղծելով անվտանգության ապահովվածության պատրանք։ Նրա կարծիքով՝ սա հերթական քայլն է, որով իշխանությունները փորձում են պահպանել իրենց դիրքերը՝ շարունակելով նախկինում կիրառված գործելակերպը։