Պարտավոր ենք ամեն ինչ անել, որ տարածաշրջանում խաղաղություն լինի․ Էրդողան
Wed, 01 Apr 2026 17:30:48 +0400
Թուրքիայի նախագահ Ռեջեփ Թայիփ Էրդողանը հայտարարել է, որ երկրի գերակա խնդիրը Անկարային Իրանի դեմ ԱՄՆ-ի և Իսրայելի պատերազմից հեռու պահելն է։
«Մենք վճռականորեն տրամադրված ենք Թուրքիային այս կրակից հեռու պահել։ Առանց որևէ թակարդի մեջ ընկնելու, մենք գործում ենք զգուշությամբ և չափավորությամբ», – ասել է Էրդողանը՝ ելույթ ունենալով «Արդարություն և զարգացում» կուսակցության խորհրդարանական խմբակցության նիստում։
Նա նաև հայտարարել է, որ արտաքին գործերի նախարար Հաքան Ֆիդանը շարունակում է պատերազմը դադարեցնելու դիվանագիտական ջանքերը՝ մատնանշելով Իսլամաբադում կայացած Թուրքիայի, Սաուդյան Արաբիայի, Եգիպտոսի և Պակիստանի արտաքին գործերի նախարարների հանդիպումը։
«Մեր պաշտպանության նախարարը, Ազգային հետախուզական կազմակերպության ղեկավարը և այլ նախարարներ նույնպես աշխատում են այս ուղղությամբ։ Թուրքիայի դիրքորոշումը բյուրեղյա պարզ է։ Մենք մեր պարտականությունն ենք համարում անել ամեն ինչ, որպեսզի մեր տարածաշրջանում խաղաղություն ապահովվի», – հավելել է Էրդողանը։