Հաղթանակները փորձում են ջնջել ժողովրդի հիշողությունից

Thu, 02 Apr 2026 11:40:34 +0400

Եռաբլուր զինվորական պանթեոնում լրագրողների հետ զրույցում Արցախի Ազգային ժողովի նախագահ Աշոտ Դանիելյանը քննադատել է Հայաստանի գործող իշխանությունների մոտեցումները՝ կապված Արցախի թեմայի հետ։

Դանիելյանի գնահատմամբ՝ իշխանությունները նպատակաուղղված կերպով փորձում են նվազեցնել կամ ամբողջությամբ մոռացության մատնել Արցախի հետ կապված հաղթանակները՝ դրանք դուրս մղելով հասարակական հիշողությունից։ Նրա խոսքով՝ այս գործընթացը ունի հստակ ծրագրված բնույթ և հետևողականորեն իրականացվում է։

Աշոտ Դանիելյանը նաև տարակուսանք է հայտնել այն փաստի առնչությամբ, որ Ապրիլյան քառօրյա պատերազմի տարելիցի օրը Հայաստանի իշխանություններից որևէ ներկայացուցիչ չի այցելել Եռաբլուր՝ հարգանքի տուրք մատուցելու զոհվածների հիշատակին։ Նրա գնահատմամբ՝ այդպիսի վերաբերմունքը ևս վկայում է թեմայի նկատմամբ պետական մակարդակով ձևավորված վերաբերմունքի մասին։