Հայաստանը պատրաստվում է մտնել ՌԴ-ին թշնամական դաշինք, ծանր հետևանքներ կլինեն․ Օվերչուկ
Thu, 02 Apr 2026 14:30:17 +0400
Ակնհայտ է, որ Հայաստանը պատրաստվում է մտնել ՌԴ-ի նկատմամբ թշնամաբար տրամադրված դաշինք։ Այս մասին «ТАСС»-ի հետ հարցազրույցում ասել է Ռուսաստանի փոխվարչապետ Ալեքսեյ Օվերչուկը՝ ընդգծելով, որ նման սցենարը ծանր հետևանքներ կունենա։
«Այն, ինչ մենք տեսնում ենք երկաթուղային կոնցեսիայի հետ կապված իրադարձությունների օրինակով, տեղավորվում է Հայաստանի ղեկավարության կողմից հռչակված քաղաքական տրամաբանության մեջ՝ մերձենալ Եվրոպական միության հետ, որն ապրում է տնտեսական անկում և վերափոխվում է Ռուսաստանի նկատմամբ թշնամաբար տրամադրված ռազմաքաղաքական դաշինքի»,- ասել է Օվերչուկը։
Նա շեշտել է, որ «ցանկանո՞ւմ են արդյոք հայերը դառնալ Ռուսաստանի նկատմամբ թշնամաբար տրամադրված բլոկի մաս՝ դա հենց հայերի գործն է»։
«Մեզ համար ակնհայտ է, որ նրանց նախապատրաստում են դրան, ինչպես նաև ակնհայտ են իրադարձությունների նման զարգացման երկարաժամկետ ծանր հետևանքները»,- նշել է Օվերչուկը։