Անասնապահն ականի պայթյունից վիրավորվել է
Fri, 03 Apr 2026 11:39:13 +0400
Նոյեմբերյան համայնքի Կոթի գյուղից տեղեկացանք, որ ապրիլի 2-ին, ժամը 15-ի սահմաններում Կոթի գյուղի սահմանամերձ Խոլնի քար տարածքում իր կորած անասունն է որոնելիս եղել եւ հակահետևակային ականի պայթյունից վիրավորվել է։ Վիրավորվածը Կոթի գյուղի 41-ամյա բնակիչ Արտյոմ Հարությունյանն է։ Համագյուղացիները նրան սահմանագոտուց դուրս են բերել, շտապ օգնության ավտոմեքենայով տեղափոխել Նոյեմբերյանի բժշկական կենտրոն, որտեղ նրա աջ ոտքը՝ կոճից վերև անդամահատվել է։
Եթե անասնապահը հասել է սահման ու ականի վրա վիրավորվել, հարց է ծագում՝ իսկ ո՞ւր էին սահմանի այդ հատվածը հսկող սահմանապահները։ Կամ՝ զգուշացնող նշանները, որ բնակչին զգուշացնեին տարածքի ականապատված լինելու մասին։ Նրանք անգամ ականի պայթյունից հետո չեն հայտնվել, որ վիրավորին աջակցություն ցուցաբերեն։ Մինչ պաշտպանության նախարար Սուրեն Պապիկյանը զբաղված է իշխող կուսակցության քարոզարշավով, բանակում, սահմանագոտում արտակարգ դեպքեր են լինում, որոնց հետևանքով լինում են նաեւ զոհեր ու վիրավորներ, իսկ ինքը ընդդիմություն է «քլնգում» եւ սրտիկներ ցույց տալիս։