Արցախցիները թիրախավորվում են, իսկ իրավական մեխանիզմները չեն աշխատում
Fri, 03 Apr 2026 17:36:37 +0400
Արցախի հանրային խորհրդի անդամ Նարե Սիմոնյանը հայտարարել է, որ մի քանի անգամ փորձել են իրավական ճանապարհով պատասխանատվության ենթարկել այն անձանց, ովքեր, նրա խոսքով, թիրախավորում են արցախցիներին և տարածում կեղծ տեղեկություններ ու վիրավորական խոսույթ։
Նրա խոսքով՝ նման հրապարակումներում արցախցիներին հաճախ վերագրվում են բացասական վարքագծեր, օրինակ՝ թե իբր նրանք ատելությամբ են վերաբերվում Հայաստանին կամ հրաժարվել են աջակցություն ցուցաբերել զինվորներին։ Սիմոնյանի գնահատմամբ՝ այդպիսի պնդումները իրականությանը չեն համապատասխանում և ձևավորում են հասարակական թշնամանք։
Նա նաև նշել է, որ իրենց կողմից ներկայացված իրավական դիմումները տարբեր դեպքերում չեն ընդունվել կամ դրանց հիման վրա վարույթներ չեն նախաձեռնվել, ինչը, նրա կարծիքով, խնդիր է իրավական համակարգի արձագանքի տեսանկյունից։
Միևնույն ժամանակ Սիմոնյանը ընդգծել է, որ հակառակ իրավիճակ է նկատվում արցախցիների դեպքում․ նրա խոսքով՝ նրանք հաճախ բախվում են արագ իրավական գործողությունների, երբ հրապարակավ արտահայտում են իրենց քաղաքական դիրքորոշումը։
Այս հայտարարությունները հնչել են Արցախի ներկայացուցչության շենքում կազմակերպված պանելային քննարկման ժամանակ, որը նվիրված էր արցախցիների նկատմամբ ատելության խոսքի տարածման և թիրախավորման խնդիրներին։