«Ինչու ապրիլյան պատերազմում չպարտվեցինք»․ Սերժ Սարգսյանը փակագծեր է բացում
Sun, 05 Apr 2026 13:30:00 +0400
ՀՀԿ համագումարի ընթացքում Հայաստանի երրորդ նախագահ Սերժ Սարգսյանը անդրադարձել է 2016 թվականի ապրիլյան քառօրյա պատերազմի իրադարձություններին։
Նրա խոսքով՝ այդ օրերին հայկական բանակը և դիվանագիտությունը միասին ծառայում էին երկու հայկական պետությունների և հայ ժողովրդի շահերին։
Սարգսյանը նշել է, որ պատերազմի ընթացքում և դրանից հետո տարածվել են բազմաթիվ, ըստ նրա, ապատեղեկատվություններ՝ կապված զոհերի թվերի, բանակի ապահովվածության և զինտեխնիկայի վիճակի վերաբերյալ։
Նա ընդգծել է, որ դրսից ֆինանսավորվող տարբեր կազմակերպություններ նպատակաուղղված կերպով տարածել են նման պնդումներ, որոնք, նրա խոսքով, վնասել են բանակի հեղինակությանը։
Սարգսյանի գնահատմամբ՝ 2018 թվականի քաղաքական փոփոխություններից հետո ևս շարունակվել են բանակի վերաբերյալ տարբեր քննադատություններ և շահարկումներ, իսկ ստեղծված քննիչ հանձնաժողովի աշխատանքը, նրա խոսքով, ի վերջո հաստատել է, որ տարածված պնդումները իրականությանը չեն համապատասխանել։
Նա ընդգծել է, որ ապրիլյան պատերազմի օրերին ժողովուրդը և բանակը եղել են միասնական, իսկ բանակը՝ «հայրենիքի պողպատե վահանը»։