Արևմուտքում կրկին պնդում են՝ Խամենեին անգիտակից է․ նշել են բուժման վայրը
Tue, 07 Apr 2026 10:00:40 +0400
Իրանի գերագույն առաջնորդ Մոջթաբա Խամենեին անգիտակից վիճակում է և բուժում է ստանում Ղոմ քաղաքում, հաղորդում է The Times-ը՝ հղում անելով ԱՄՆ-Իսրայելական հետախուզության կողմից արաբ դաշնակիցներին տրամադրված տեղեկություններին։
Նշվում է, որ Խամենեին ներկայում անկարող է կառավարել երկիրը և բուժում է ստանում Թեհրանի հարավում գտնվող կրոնական կենտրոնում։
Թերթը հաղորդում է, որ այս տեղեկատվությունը տրամադրվել է տարածաշրջանային գործընկերներին և կարող է լինել Խամենեիի գտնվելու վայրի մասին առաջին ցուցումը պատերազմի սկզբից ի վեր։
Թեպետ արևմտյան լրատվամիջոցները պնդում են, թե Մոջթաբա Խամենեին հանրությանը չի հայտնվել Իրանի դեմ Իսրայելա-ԱՄՆ ռազմական գործողության սկզբից ի վեր, իրանական պետական ԶԼՄ-ները նախօրեին հրապարակել էին նրա ուղերձը՝ կապված ԻՀՊԿ հետախուզության պետի սպանության հետ։ Նա, մասնավորապես, պաշտոնյանի մահը կապել է ԱՄՆ-ի և Իսրայելի ձախողումների հետ՝ հայտարարելով, որ սպայի մահը չի ազդի երկրի զինված ուժերի վրա։