Բայրամովը ղազախ գործընկերոջը ներկայացրել է Հայաստանի հետ խաղաղության գործընթացը
Wed, 08 Apr 2026 14:13:02 +0400
Բաքվում տեղի է ունեցել Ադրբեջանի և Ղազախստանի արտաքին գործերի նախարարներ Ջեյհուն Բայրամովի և Երմեկ Կոշերբաևի ընդլայնված կազմով հանդիպումը։
Տեղեկատվությունը տեղադրվել է Ադրբեջանի արտաքին գործերի նախարարության X սոցիալական հարթակի էջում, հայտնում են տեղի ԶԼՄ-ները։
Ադրբեջանն ու Ղազախստանը կրկին վերահաստատել են իրենց ամուր ռազմավարական կապերը՝ նշելով տնտեսության, առևտրի, էներգետիկայի, արդյունաբերության, գյուղատնտեսության, տրանսպորտի, լոգիստիկայի և թվային տեխնոլոգիաների ոլորտներում աճող համագործակցությունը։
Նախարարները նաև ընդգծել են Միջին միջանցքի դերը Եվրոպա-Ասիական առևտրի զարգացման գործում՝ նշելով համատեղ նախագծերի կարևորությունը, որոնք նպաստում են տարանցիկ ենթակառուցվածքների և տարածաշրջանային կապերի ամրապնդմանը։
Կողմերը մտահոգություն են հայտնել Մերձավոր Արևելքում ստեղծված իրավիճակի վերաբերյալ և հույս հայտնել, որ ձեռք բերված հրադադարը կապահովի խաղաղություն և կայունություն տարածաշրջանում։
Նախարարները քննարկել են նաև տարածաշրջանային և գլոբալ անվտանգության հարցեր։
Ջեյհուն Բայրամովը նաև իր գործընկերոջը ներկայացրել է Ադրբեջանի և Հայաստանի միջև ընթացող խաղաղության գործընթացի մասին։