Դոնալդ Թրամփը սպառնում էր, որ այս գիշեր մի ամբողջ քաղաքակրթություն կկործանվի, և այն այլևս երբեք չի կարող վերածնվել։ Նկատի ուներ Իրանը։ Իրանի քաղաքացիները կենդանի պատ կազմեցին երկրի էլեկտրակայանների, կամուրջների մոտ՝ ԱՄՆ նախագահ Դոնալդ Թրամփի սպառնալիքներից հետո։ Սա ցույց տվեց, որ առյուծներ են առաջնորդում Իրանի ժողովրդին, որոնց համար հայրենիքի համար զոհվելը պատիվ է։ Այս ֆոնի վրա նույնիսկ չեմ կարողանում պատկերացնել, թե հայ ժողովրդին ովքեր են առաջնորդում։ Կար ժամանակ, երբ հայ ժողովուրդն էլ այնպիսին էր, ինչպիսին Իրանի ժողովուրդը։ Հայրենիքի համար զոհվելը պատիվ էր նրա համար։ Ու դրա համար հաղթանակներ գրանցեցինք, դրա համար էին մեզ ամբողջ աշխարհում հարգում։

Բայց ամեն ինչ մի օրում չի փոխվում։ Ժողովուրդը միանգամից չի կորցնում իր ոգին։ Այն կամաց-կամաց են քանդում՝ բառերով, կեղծ խոստումներով, պարտությունը «խաղաղություն» կոչելով։ 8 տարի առաջ իշխանության եկավ մեկը, ով հայրենիքի համար զոհվելը ոչինչ համարեց, նսեմացրեց մեր զինվորներին ու Բանակը, ձերբակալեց հերոսներին և սկսվեց հանձնումների շղթան՝ կեղծ խաղաղության պլակատներով։ Արցախցի կնոջը փախած համարեց, երբ իրականում փախածը հենց իշխանությունն էր՝ պատասխանատվությունից, ճշմարտությունից, սեփական ժողովրդի առաջ կանգնելու պարտականությունից։

Երբ հերոսին դարձնում են մեղավոր, երբ պայքարը ներկայացնում են որպես սխալ, երբ քեզ համոզում են, որ այլ տարբերակ չկար՝ հենց այդ պահին է սկսվում ամենավտանգավոր պարտությունը։ Ոչ թե սահմանին, այլ ներսում։ Որովհետև տարբերակ մի՛շտ կա։ Միշտ կա արժանապատիվ ճանապարհ, թեկուզ դժվար, թեկուզ ցավոտ։ Բայց դրա համար պետք է կամք։ Պետք է առաջնորդ, ով չի վախենա ճշմարտությունից։ Եվ ժողովուրդ, որը չի վախենա այդ ճշմարտությունը լսելուց։

Այսօր մեր ամենամեծ պայքարը նույնիսկ սահմանին չէ։ Այն մարդու ներսում է՝ հիշողության, արժանապատվության, ինքնության համար։ Եթե մենք մոռանում ենք, թե ովքեր ենք եղել, եթե սկսում ենք ամաչել մեր սեփական հերոսներից, ապա արդեն պարտվել ենք՝ անկախ նրանից, թե ինչ է գրված քարտեզի վրա։ Եվ վերջում հարցը մնում է նույնը՝ ոչ թե ո՞վ է մեզ առաջնորդում, այլ՝ արդյո՞ք մենք դեռ պատրաստ ենք պահանջել, ընտրել առաջնորդ, որը մեզ չի հանգստացնի կեղծ խոսքերով,
այլ կստիպի հիշել, թե ովքեր ենք մենք և ինչ պատմություն ենք ունեցել։