Խցանումների համար, փաստորեն, վարորդներն են մեղավոր
Thu, 09 Apr 2026 12:08:33 +0400
Երևանում երթևեկության խցանումների նվազեցման ուղղությամբ քաղաքային իշխանությունները նախատեսում են նոր քայլեր և վստահ են, որ ժամանակի ընթացքում հնարավոր կլինի էականորեն կարգավորել իրավիճակը։ Այս մասին կառավարության նիստի ընթացքում հայտարարեց Տիգրան Ավինյանը։
Քաղաքապետի խոսքով՝ արդեն ներդրվում են նոր մեխանիզմներ, որոնցից մեկը վերաբերում է սխալ կայանված ավտոմեքենաներին։ Նախատեսվում է, որ օրինազանց վարորդների մեքենաների տարհանումը կիրականացվի մասնավոր քարշակ ծառայությունների միջոցով՝ արտապատվիրակման ձևաչափով։
Ավինյանը նաև ընդգծեց, որ մայրաքաղաքում խցանումների հիմնական պատճառներից մեկը մեքենաների մեծ քանակն է։ Նրա ներկայացմամբ՝ միայն Երևանում տարեկան շուրջ 12 հազար նոր ավտոմեքենա է գրանցվում, և դրանց ավելանում են նաև մարզերից քաղաք մտնող հազարավոր մեքենաները։
Խնդրի առաջացման մեջ կարևոր դեր ունի նաև վարորդների վարքագիծը։ Քաղաքապետը նշեց, որ հաճախ խցանումներ են առաջանում այն պատճառով, որ որոշ վարորդներ դեղին լույսի տակ փորձում են անցնել խաչմերուկը և արդյունքում կանգնում են դրա կենտրոնում՝ խոչընդոտելով երթևեկությունը։
Քաղաքային իշխանությունների տեսլականը, ըստ նրա, այն է, որ Երևանում առաջնահերթ դառնա հանրային տրանսպորտը։