Թրամփը հանուն Իրանի համոզել է Իսրայելին հաշտվել Լիբանանի հետ․ բանակցելու են
Fri, 10 Apr 2026 11:00:44 +0400
Իսրայելը և Լիբանանը պաշտոնապես սկսում են բանակցություններ հրադադարի և երկարատև խաղաղության համար։
Այս մասին հաղորդում են իսրայելական լրատվամիջոցները՝ վկայակոչելով պաշտոանական աղբյուրները։
Հաղորդագրությունների համաձայն՝ երկխոսությունը կանցկացվի դիվանագիտական մակարդակով՝ Վաշինգտոնում երկու երկրների դեսպանների մասնակցությամբ։ Լիբանանում ԱՄՆ դեսպան Միշել Իսան կապահովի անմիջական աջակցություն և համակարգում տեղում։
Պաշտոնական շփումներ սկսելու որոշումը հետևում է Վաշինգտոնի ինտենսիվ դիվանագիտական ջանքերին՝ «ուղղված տարածաշրջանում իրավիճակը կայունացնելուն»։ Այս քայլին նախորդել է Իսրայելի վարչապետ Բենիամին Նեթանյահուի և ԱՄՆ նախագահ Դոնալդ Թրամփի միջև հեռախոսազրույցը։ Զրույցի ընթացքում ամերիկացի առաջնորդը խնդրել է Իսրայելի վարչապետին «նվազեցնել Իսրայելի պաշտպանության բանակի հարվածների ինտենսիվությունը» Լիբանանում գտնվող թիրախների դեմ։ Սպիտակ տունը կարծում է, որ լարվածության թուլացումը անհրաժեշտ է՝ Իրանի հետ սկսվող հրադադարի խափանումը կանխելու և դիվանագիտության համար բարենպաստ պայմաններ ստեղծելու համար։
ԱՄՆ նախագահը Նեթանյահուի հետ խորհրդակցություններից անմիջապես հետո իր անվտանգության կաբինետին հանձնարարել է հնարավորինս շուտ սկսել բանակցային գործընթացը։ Նա հայտարարել է, որ բանակցությունները կկենտրոնանան «Հըզբոլլահ»-ի զինաթափման և Իսրայելի ու Լիբանանի միջև խաղաղ հարաբերությունների հաստատման, Իսրայելի հյուսիսային տարածքները հրետակոծելու սպառնալիքի վերացման վրա։
Պաշտոնական հանդիպումների ժամանակացույցը ներկայումս վերջնականապես որոշվում է, սակայն երկու կողմերն էլ պատրաստակամություն են հայտնել օգտագործել ԱՄՆ միջնորդական հարթակը՝ ձգձգված ռազմական հակամարտությունից դուրս գալու ելք գտնելու համար։
Ավելի վաղ լիբանանցի բարձրաստիճան պաշտոնյան Reuters-ին ասել էր, որ Լիբանանը կողմ է ժամանակավոր հրադադարին՝ Իսրայելի հետ ավելի լայն բանակցությունների համար ճանապարհ հարթելու համար։
Իսրայելցի բարձրաստիճան պաշտոնյան Axios-ին ասել է, որ Իսրայելի և Լիբանանի միջև ուղիղ բանակցությունները կսկսվեն հաջորդ շաբաթ Վաշինգտոնում։ Դեռևս հայտարարված չէ, թե արդյոք լիբանանյան «Հըզբոլլահ» խմբավորումը կմասնակցի բանակցություններին։