ԱԳԼՃԿ-ում գազի պայթյունից վիրավորին փրկելու համար դրամահավաք են անում
Fri, 10 Apr 2026 19:10:16 +0400
Ապրիլի 6-ի երեկոյան Նոյեմբերյան համայնքի սահմանամերձ Բաղանիս գյուղի ավտոգազալցավորման ճնշման կայանում (ԱԳԼՃԿ) լիցքավորվող ավտոմեքենայի գազի բալոնը պայթել է, որի հետևանքով կայանի գազալիցքավորողը վնասվածքներով տեղափոխվել է Նոյեմբերյանի բժշկական կենտրոն։
Նոյեմբերյանի ԲԿ-ից տեղեկացանք, որ պայթունից վիրավորված Կողբ գյուղի բնակիչը բուժման համար տեղափոխվել է Երևան։
Դեպքից 3 օր անց՝ ապրիլի 9-ին Կողբ բնակավայրի վարչական ղեկավար Արարատ Թամրազյանը Ֆեյսբուքում կոչ է արել․ «Հարգելի հայրենակիցներ, հայցում ենք բոլորիդ աջակցությունը Կողբ գյուղի բնակիչ Սերյոժա Հովիկի Հարությունյանի հրատապ և անհետաձգելի բուժումը կազմակերպելու նպատակով: Սերյոժա Հարությունյանը 06.04.2026 թվականին գազալցակայանում տեղի ունեցած վթարի հետևանքով ստացել է ծանր մարմնական վնասվածքներ և այժմ գտնվում է Էրեբունի բժշկական կենտրոնի վերակենդանացման ինտենսիվ թերապիայի բաժանմունքում: Սերյոժայի կյանքը փրկելու համար ձեր նյութական աջակցությունը կարող եք փոխանցել հետևյալ հաշվեհամարներով, ինչպես նաև կարող եք մոտենալ Կողբի վարչական նստավայր» :