Ընտրությունները լինելու են գոյաբանական
Sat, 11 Apr 2026 17:49:46 +0400
Ազատության հրապարակում նախատեսված «Ուժեղ Հայաստան՝ Սամվել Կարապետյանի հետ» դաշինքի հանրահավաքից առաջ ԵՊՀ Հայոց լեզվի պատմության ամբիոնի դոցենտ Նարինե Դիլբարյանը լրագրողների հետ զրույցում կարևորել է ընդդիմադիր ուժերի համախմբման անհրաժեշտությունը։
Նրա խոսքով՝ հայկական պետականության օրակարգով հանդես եկող բոլոր քաղաքական ուժերը պետք է միավորեն իրենց ջանքերը՝ հասնելու ընդհանուր նպատակների։ Դիլբարյանը նշել է, որ առաջիկա հունիսի 7-ի ընտրությունները կրում են գոյաբանական նշանակություն՝ դրանք գնահատելով որպես ընտրություն հայկական արժեքների շուրջ։
Նա ընդգծել է, որ ընտրողների համար կարևոր է տեսնել միասնականություն քաղաքական դաշտում, քանի որ, նրա համոզմամբ, այդ դեպքում հնարավոր կլինի ապահովել ոչ միայն Հայաստանի երրորդ հանրապետության շարունակականությունը, այլև պահպանել արցախյան պայքարի գաղափարական ուղղությունը։