«Հրապարակ»․ Ապարան եւ Լոռի
Tue, 14 Apr 2026 10:25:58 +0400
Ապրիլի 11-ի առավոտյան Նիկոլ Փաշինյանի գլխավորությամբ «ուրախ ավտոբուսը» կրկին պետք է մեկներ մարզ, այս անգամ` Լոռի: Ավտոբուսի մեկնելուց առաջ նույն երթուղիով Լոռի էր ուղեւորվել նաեւ ոստիկանության գվարդիայի ավտոբուսը` մարզում Նիկոլ Փաշինյանի անվտանգ շարժն ապահովելու համար։ Ամեն անգամ են ուժայիններն ուղեկցում նրան, թեեւ պարզ չէ, թե ինչու են Երեւանից մեկնում, եթե բոլոր մարզերում էլ ոստիկաններ կան եւ ոչ քիչ թվով: Բայց այս անգամ ոստիկանության ավտոբուսի մասնակցությամբ տեղի է ունեցել ողբերգական ավտովթար՝ մահվան ելքով, բազմաթիվ վիրավորներով։
Քննչական կոմիտեն հայտարարել էր, որ գվարդիայի ավտոբուսը մեկնելիս է եղել Լոռու մարզ՝ ծառայություն իրականացնելու, իսկ 2 օր առաջ գվարդիայի ղեկավար Հայկ Բաբայանը մեր հարցին ի պատասխան ասել էր՝ ավտոբուսը մեկնում էր Արագածոտնի մարզ։ Հիմա Լոռի՞, թե՞ Արագածոտնի մարզ էին շտապում գվարդիայի աշխատակիցները:
Տեղեկացանք,որ ավտոբուսն Ապարանում մի խմբի պետք է իջեցներ, իսկ մյուսները պետք է շարունակեին ճանապարհը` հասնեին Լոռի եւ ուղեկցեին ՀՀ վարչապետի շարասյունը։ ՆԳՆ-ից մեզ փոխանցեցին. «ՀՀ ՆԳՆ ոստիկանության գվարդիայի ծառայողները նշված տրանսպորտային միջոցով ուղեւորվել են Լոռու եւ Արագածոտնի մարզեր՝ ծառայություն իրականացնելու»։