Երկաթուղում ամենավտանգավոր արտակարգ իրավիճակներից մեկը քարաթափումն է։ Սա բավականին տարածված երևույթ է Հայաստանի համար, որտեղ երկաթուղին հիմնականում անցնում է ժայռերի և կիրճերի միջով։ Նմանատիպ վթարների կանխման նպատակով «Հարավկովկասյան երկաթուղի» ընկերության աշխատակիցները մշտապես շրջայց են իրականացնում շուրջ 700 կիլոմետր երկարությամբ երկաթուղային գծերի երկայնքով։ Այնուամենայնիվ, լինում են իրավիճակներ, երբ գծերի վրա հայտնվում են օտար առարկաներ։

Այդպիսի արտակարգ իրավիճակներից մեկը կանխել է Սպիտակ քաղաքի բնակիչ Գրիգոր Մանուկյանը։ Ապրիլի 9-ի երեկոյան աշխատանքից տուն վերադառնալիս նա ականատես է եղել քարաթափման, երբ ժայռից պոկված մոտ երեքտոննանոց քարը վնասել է երկաթուղային գիծը։ Դեպքը տեղի է ունեցել Լոռու մարզում՝ Սպիտակ–Նալբանդ հատվածում, որտեղ առկա են բազմաթիվ պոտենցիալ քարաթափման վտանգ ունեցող տեղամասեր։ Գծի շրջայց իրականացնող աշխատակիցներն ու մեքենավարները լավ ճանաչում են վտանգավոր հատվածները և դրանցով անցնելիս ցուցաբերում են առավել զգոնություն։ Հատկապես անձրևների շրջանում հաճախ առաջանում է քարաթափման վտանգ։ Սակայն այս անգամ փլուզումը տեղի է ունեցել այնպիսի հատվածում, որտեղ նախկինում նման երևույթներ չեն արձանագրվել։

Բացի այդ, լեռնային ռելիեֆի պատճառով մեքենավարները միշտ չէ, որ ունեն բավարար տեսանելիություն՝ գծերի վրա հայտնված օտար առարկաներից խուսափելու համար։ Սա էականորեն մեծացնում է հնարավոր վթարի վտանգը։ «Քարաթափումը վնասել էր գծերը հենց ոլորանից հետո։ Տվյալ հատվածում մեքենավարի տեսանելիությունը կազմում է մոտ 100 մետր, իսկ մութ ժամերը էլ ավելի էին բարդացնում իրավիճակը», — նշում է Վանաձորի ԳԿՄ-ի ղեկավար Արամ Մկրտչյանը։ — «Չի բացառվում, որ քաղաքացու զգոնությունը կանխել է գնացքի վնասումը»։

Ոչ հեռու անցած տարվա դեկտեմբերին քարաթափումը դարձել էր բեռնատար գնացքի լոկոմոտիվի ռելսերից դուրս գալու պատճառ Սևանի ճանապարհահատվածում։ Ճանապարհի կորության պատճառով լոկոմոտիվային բրիգադը ուշ էր նկատել խոչընդոտը, և արտակարգ արգելակումը չէր կարողացել կանխել բախումը։

Սպիտակում քաղաքացու գիտակցված քայլը՝ քարաթափման մասին ԱԻՆ-ին ահազանգելը, հնարավորություն է տվել ժամանակին ձեռնարկել անհրաժեշտ միջոցառումներ և ապահովել երթևեկության անվտանգությունը տվյալ հատվածում։ Փրկարարների ուժերով գիծը մաքրվել է քարերից, իսկ «Հարավկովկասյան երկաթուղի» ընկերության բրիգադները օպերատիվ վերականգնել են այն։ Երթևեկությունը վերականգնվել է։

Այս կապակցությամբ ընկերությունն իր երախտագիտությունն է հայտնում Սպիտակի բնակիչ Գրիգոր Մանուկյանին՝ ցուցաբերած անտարբեր չլինելու և զգոնության համար։ Ընկերությունը նաև շնորհակալություն է հայտնում Հայաստանի Փրկարար ծառայությանը, որը արագ և արդյունավետ արձագանքում է երկաթուղում առաջացող արտակարգ իրավիճակների վերաբերյալ ահազանգերին։ Այս անգամ ևս փրկարարները արագ արձագանքել են, ժամանել դեպքի վայր և մաքրել գիծը, որպեսզի «Հարավկովկասյան երկաթուղի» ընկերության աշխատակիցները վերականգնեն երկաթուղային գիծը։