Ապրիլի 18-ին Մեդիա նախաձեռնությունների կենտրոնի «Թվապատում Aftershock» կոնֆերանսի շրջանակում Մեդիամաքսը կանցկացնի «Գործընկերություն հանուն կայունության. մեդիան եւ բիզնեսը բազմաճգնաժամի պայմաններում» քննարկում, որին չգիտես ինչու մասնակցելու են հիմնականում Արևմուտքի հետ առնչություն ունեցող լրատվամիջոցներ եւ ընկերություններ։ Մասնակիցների ցանկում կարդացինք Civilnet, Hetq, Factor լրատվամիջոցների, Media Systems գործակալության, Newmag հրատարակչության, Յուքոմ ընկերության Այդիբանկ եւ մի քանի այլ բանկերի անունները: Պանելային քննարկման մոդերատոր, Մեդիամաքս լրատվական գործակալության տնօրեն Արա Թադևոսյանին «Հրապարակը» մի քանի հարց է ուղղել թեմայի մասին:

– Պարոն Թադևոսյան, ինչպե՞ս է ստացվում, որ արևմտյան գրանտներ ստացող լրատվամիջոցներն են մասնակցում այդ քննարկմանը, իսկ մնացյալ՝ անկախ կամ ակտիվ լրատվամիջոցները, որոնք ամենօրյա աշխատանք են կատարում՝ հանրությանը տեղեկատվություն փոխանցում, չկան կոնֆերանսի հրավիրվածների կազմում:

– Իսկ ինչպե՞ս է ԶԼՄ-ի ակտիվությունը որոշվում:

– Օրինակ նրանով, թե ինչ ռեժիմով են աշխատում եւ ինչ պարբերականությամբ են հասարակությանը հուզող հարցերին, իշխանություններին գովեստի խոսքեր շռայլելուց անդին, նաև այլ հարցերի անդրադառնում: Օրինակ` Newmag հրատարակչությունն ի՞նչ կապ ունի մեդիայի հետ:

– Եթե Դուք կարդացել եք մեր քննարկման թեման, ապա պետք է պատասխանը պարզ լիներ: Ի դեպ` մենք որպես միջոցառման կազմակերպիչ հրավիրել ենք նրանց, ում նպատակահարմար և հետաքրքիր ենք համարել:

– Օրինակ` «Առավոտ», «Ժողովուրդ», 168, Mediahub եւ շատ այլ լրատվականներն ինչո՞վ են անհետաքրքիր: Ի՞նչ չափանիշներով եք որոշել նպատահարմարությունը:

– Եթե Ձեզ հետաքրքիր է, կարող եք գալ:

– Ստացվել է այնպես, որ բոլոր հրավիրյալները ֆինանսավորվում են Արևմուտքից, որոշակի հայացքների կրողն են, որոշները պրոիշխանական դիրքորոշում ունեն: Կամ բանկերն են մասնակցում։ Ինչ սկզբունքո՞վ եք նրանց ընտրել: Ի դեպ` հնարավո՞ր է վերանայեք մասնակիցների ցանկը:

– Որևէ վերանայում նախատեսված չէ: Ինչ վերաբերում է բանկերին և մոբայլ ընկերությանը, որ նշեցիք, նրանք բիզնես են, դրա համար էլ նրանց նույնպես հրավիրել ենք, ի՞նչ կա այդտեղ չհասկանալու: Իսկ Newmag-ը նույնպես բիզնես է, նաև նախկինում` մեդիա էր: Կարող եք վաղը գալ, լսել մեզ և նոր քննարկումից հետո Ձեր տպավորություններով կկիսվեք, այլ ոչ թե դրանից առաջ:

– Մենք ընդամենը մասնակիցների կազմով են հետաքրքրվում, այնուամենայնիվ Դուք չպատասխանեցիք իմ հարցին, թե ինչո՞վ են վերոնշյալ լրատվամիջոցները մյուսներից ավելի հետաքրքիր:

– Մենք կազմակերպիչ լինելով ընտրել ենք նրանց, ում համարել ենք հետաքրքիր: Ինչ վերաբերում է Ձեր նշած օրինակներին, ապա նույն «Առավոտում» աշխատում են իմ լավ ընկերները` Արամ Աբրահամյանն ու Աննա Իսրայելյանը, և եթե նրանց մոտ նման հարց չի առաջացել, ապա չեմ հասկանում՝ ինչու եք Դուք մտահոգվում:

– Միայն «Առավոտը» չի բացակայում, այլ նաեւ, ասենք, 168․ամ-ը, 24․ նյուզը։ Օրինակ ինչո՞ւ «Ժողովուրդ» օրաթերթը հրավիրված չէ:

– Որովհետև կարծում ենք, որ մեր հրավիրված ԶԼՄ-ների մասնակցությամբ կունենանք ավելի հետաքրքիր քննարկում:

– Դուք վիրավորում եք մնացյալ բոլոր լրատվամիջոցներին, նրանց համարելով անհետաքրքիր:

– Ես նման հարցերի չեմ պատասխանի, ես այլևս ոչինչ չունեմ ասելու: