«Հրապարակ»․ Նրանք վերջացած մարդիկ են․ վերջին ծառայություններն են մատուցում Փաշինյանին
Sat, 18 Apr 2026 09:45:21 +0400
«Հրապարակի» զրուցակիցը «Նժար» կուսակցության վարչապետի թեկնածու, իրավապաշտպան Նինա Կարապետյանցն է:
– «Քաղհասարակության» կարկառուն ներկայացուցիչներից մեկը` Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցը, նախօրեին փորձել է ծառայություն մատուցել գործող իշխանություններին եւ արտահայտվել է ընտրակաշառքի թեմայով՝ անդրադառնալով իշխանությունների կողմից «Ուժեղ Հայաստանի» նկատմամբ հարուցված կեղծ քրեական վարույթներին, որոնցով անգամ ՔՊ-ին ենթակա դատարանները չեն կարողանում կալանքի սանկցիաներ տալ: Նա մասնավորապես գրել է, որ ընդդիմությունը կանանց առաջ է մղում, թաքնվում նրանց հետեւում: Ոչ ավել, ոչ պակաս՝ հայկական ընդդիմությանը համեմատել է ջիհադիստների ու իսլամական ծայրահեղականների հետ, որոնք կանանց ու երեխաներին օգտագործում էին որպես «մեկանգամյա օգտագործման նյութ»: Մի կողմից, այս անձը մոռացել է, որ 18-ի հեղափոխության ժամանակ անգամ դպրոցների կրտսեր դասարանների աշակերտներն էին մասնակցում, մյուս կողմից` կարծում է, որ կանայք չպետք է ներգրավված լինեն ընտրություններին, հատկապես` ընդդիմության կողմից: Այսինքն, կանայք չպետք է զբաղվեն քաղաքականությամբ: Երկար տարիներ մարդու իրավունքների եւ հիմնարար ազատությունների համար իբրեւ թե պայքարող այս մարդու համար կինը բացառապես լվացք անելու եւ բորշչ պատրաստելու իրավունք ունի: Ի՞նչ կարծիք ունեք նրա այդ հայտարարության մասին:
– Ես դադարել եմ հետեւել նրանց գրառումներին, որովհետեւ հասկացել եմ, որ առողջությունս այլեւս չի ներում: Չեմ ասի՝ բոլորը, բայց մեծ թվով մարդիկ, ովքեր առաջներում օբյեկտիվ էին, շատ վաղուց դադարել են լինել այդպիսին: Ակնհայտորեն ընդգծված փաղաքշական վերաբերմունք ունեն օրվա իշխանությունների նկատմամբ եւ պատրաստ են արդարացնել ամեն բան, ինչ անում է օրվա իշխանությունը: Պետք է պարզապես դադարել հետեւել այդ մարդկանց, պետք է այլ մոտեցում որդեգրել: Այժմ ձեւավորվում է թիմ, որն առանց լրացուցիչ շահառուների կարող է կոչվել քաղհասարակություն: Նրանք հիմնականում երիտասարդներ են, ովքեր առանց ֆինանսավորումների ունեն մեծ աուդիտորիա եւ վստահություն` հանրության շրջանում: Ուրախ եմ, որ տեղի է ունենում սերնդափոխություն, քանի որ մեզ պետք չէ այնպիսի քաղհասարակություն, որն իր հռչակած ստանդարտներին դեմ է գործում:
– Բայց ինչպե՞ս կարելի է կանանց ստորադասել տղամարդկանցից, մի՞թե Սաքունցը դրա համար է գրանտներ ստանում Արեւմուտքից:
– Մարդիկ, ովքեր սկզբունքորեն չեն ուզում տեսնել, որ մեր երկրում կան քաղաքական ուժեր` կին թե տղամարդ, ովքեր թրաֆիկինգի զոհեր են, էլ ի՞նչ ասես: Թվում էր, թե նրանք նախկինում ադեկվատ վարքագիծ ունեն եւ սրտիկ ուղարկողներ չեն, այժմ իշխանությունների վարքագծում ոչ մի սխալ չեն տեսնում, փոխարենը տեսնում են հակառակ թեւում գտնվող մարդկանց թերացումները: Այս մարդկանց ուղղակի պետք է իգնոր անել եւ դադարել հետեւել նրանց: Նրանք կան այնքան ժամանակ, քանի դեռ մենք նրանց կարեւորություն ու նշանակություն ենք տալիս, հենց հասկացան, որ իրենք ոչ մեկին պետք չեն, չունեն հետեւորդներ, ուղղակի կլռեն: Նրանք վերջացած մարդիկ են, վերջացել են, վերջին շնչում են եւ իրենց վերջին ծառայություններն են մատուցում Նիկոլ Փաշինյանին: