Առանց հիմնավորման Գորիսում փակվեց Սյունիքի նախկին մարզպետ Սուրիկ Խաչատրյանի ընտանիքին պատկանող գազալցակայանը
Sat, 18 Apr 2026 13:16:56 +0400
Քիչ առաջ Գորիսում ՀՀ Քննչական կոմիտեի աշխատակիցների կողմից կնիքվեց Սյունիքի նախկին մարզպետ Սուրիկ Խաչատրյանի որդուն՝ Տիգրան Խաչատրյանին պատկանող «Զաքի» ՍՊԸ գազալցակայանը։ Ընկերության գործադիր տնօրեն Մելիք Բարսեղյանի փոխանցմամբ՝ որևէ իրավական հիմք իրենց չի ներկայացվել։
Նրա խոսքով՝ գործողությունը պատճառաբանվել է ՀԴՄ կտրոնների քանակի հետ կապված կասկածներով։ «Մեր գազալցակայանում նման բան պարզապես հնարավոր չէ։ Մենք որքան գազ ստանում ենք, նույն քանակով էլ սպառում ենք, ինչը պետք է ամբողջությամբ արտացոլված լինի ՀԴՄ կտրոններում»,- ասաց Բարսեղյանը։
Ըստ շրջանառվող լուրերի, ընտրությունների նախաշեմին այս գործողությունը քաղաքական ենթատեքս ունի և պայմանավորված է Սուրիկ Խաչատրյանի քաղաքական դիրքորոշման հետ։